ZAT «Płaciežnaja sistema Biełkart» i AAT «ASB Biełarusbank« 26 maja prezientavali sumiesny prajekt kartochki.by — pieršy ŭ Biełarusi servis, jaki dazvalaje samastojna stvarać dyzajn dla svajoj płaciežnaj kartki ŭ režymie realnaha času.
Jak paviedamlajecca ŭ pres-relizie, servis kartochki.by budzie aktualny nie tolki dla dziaciej usich uzrostaŭ, ale i dla darosłych.
«Sam servis vykanany ŭ vyhladzie nievialikaha akna, u jakim z dapamohaj roznych instrumientaŭ (pendzal, ałovak, humka), a taksama palitry koleraŭ možna malavać. Atrymany malunak paśla možna zachavać na kampjutar i adnieści ŭ bank dla afarmleńnia kartki ź indyvidualnym dyzajnam albo aformić anłajn-zajaŭku», — kaža namieśnik dyrektara płaciežnaj sistemy «Biełkart» Uładzimir Husaraŭ.
Na jaho dumku, padobnyja prajekty, jakija załučajuć nasielnictva ŭ śviet bieznajaŭnych raźlikaŭ, dapamahajuć razabracca va ŭsich niuansach bieznajaŭnych płaciažoŭ. «U pryvatnaści, naprykład, čym raniej dzieci pačnuć paznavać śviet bieznajaŭnych hrošaj, tym praściej im budzie zaryjentavacca ŭ finansavych chitrasplacieńniach darosłaha žyćcia. I hałoŭnaje, my spadziajomsia, što hety servis stanie vydatnym matyvataram atrymać kartku ź indyvidualnym dyzajnam, jaki budzie unikalnym dla trymalnika», — adznačyŭ Husaraŭ.
Pačynajučy z 1 červienia ŭ ramkach prasoŭvańnia hetaha prajekta budzie prachodzić konkurs «Sam sabie dyzajnier». Štomiesiac žury budzie vybirać najlepšyja malunki ŭdzielnikaŭ roznych uzrostavych katehoryj, a pieramožcy atrymajuć kaštoŭnyja pryzy. Uziać udzieł u konkursie moža luby achvotny va ŭzroście ad šaści hadoŭ.
