Sim-kartku mabilnaha apieratara life:) ciapier možna atrymać biez naviedvańnia ofisa kampanii. U svajoj hałoŭnaj kramie na praśpiekcie Niezaležnaści ŭ Minsku kampanija pastaviła hetak zvany simkamat. Jon dazvalaje padklučycca na taryfny płan i atrymać sim-kartku na ruki apieratyŭna, biez udzieła inšaha čałavieka.
Ciapier pry dapamozie hetaha terminała možna padklučycca na taryfny płan «Start jo life», dastupnym jak hramadzianam Biełarusi, tak i Rasii. Dla padklučeńnia nieabchodny biełaruski ci rasijski pašpart, abo vid na žycharstva ŭ Biełarusi.
Achvotnyja skarystacca takoj pasłuhaj mohuć praz terminał aznajomicca z tekstam publičnaj damovy apieratara, adskanavać pašpart abo vid na žycharstva, stvaryć fota, kab sistema biaśpieki mahła paraŭnać jaho sa staronkaj ŭ dakumiencie. Zatym treba praz toj samy terminał apłacić padklučeńnie i i atrymać sim-kartku i razdrukavanuju damovu. Praces padklučeńnia takim čynam moža zaniać usiaho niekalki chvilinaŭ.
Jak paviedamili Jeŭraradyjo ŭ pres-słužbie apieratara life:), simkamat adpaviadaje ŭsim normam biełaruskaha zakanadaŭstva i dziakujučy sučasnaj sistemie šyfravańnia zabiaśpiečvaje nadziejnuju abaronu piersanalnych dadzienych abanienta.
Atrymać kartku na čužy pašpart nie atrymajecca, bo sistema adrazu vyjavić nieadpaviednaść fota pašpartu i admović u padklučeńni.
Nadalej kampanija płanuje ŭstalavać simkamaty ŭ inšych punktach, a taksama pašyryć pieralik funkcyjaŭ terminała.