Rasijskija chakiery, źviazanyja ź dziaržavaj, pranikli ŭ kampjutarnuju sietku nacyjanalnaha kamiteta Demakratyčnaj partyi ZŠA, paviedamlaje hazieta Washington Post.
Uzłomščyki atrymali dostup da bazy dadzienych, sabranaj na kandydata na pasadu prezidenta ZŠA ad Respublikanskaj partyi Donalda Trampa, paviedamili haziecie pradstaŭniki kamiteta i ekśpierty pa biaśpiecy.
U partyi taksama paviedamili, što chakiery zmahli pračytać usie elektronnyja listy i trafik čataŭ kamiteta.
Pavodle dadzienych haziety, niekatoryja z chakieraŭ mieli dostup da sietki partyi na praciahu hoda. Adnak dostup dla ich byŭ zakryty padčas čystki, jakaja prajšła ŭ hetyja vychadnyja.
Chakiery nie atrymali dostupu da finansavaj infarmacyi abo asabistaj infarmacyi sponsaraŭ partyi.
Pavodle dadzienych haziety, napadam taksama padvierhnulisia kampjutary i sietki inšych amierykanskich palityčnych arhanizacyj, a taksama asnoŭnych pretendentaŭ na pasadu prezidenta ZŠA Chiłary Klintan i Donalda Trampa. Nie stała vyklučeńniem i Respublikanskaja partyja, adnak pakul detali hetaj ataki nieviadomyja.
Ekśpierty, apytanyja hazietaj, miarkujuć, što hetyja kibierataki źjaŭlajucca svojeasablivaj formaj špijanažu. Takim čynam rasijski bok sprabuje zrazumieć, jak funkcyjanujuć amierykanskija instytuty. Tramp ža chakieraŭ cikavić tamu, što jon doŭhi čas nie ŭdzielničaŭ u palitycy, tamu ŭ rasijskaha boku nie vielmi šmat dadzienych pra jaho.
Raniej dyrektar nacyjanalnaj raźviedki ZŠA Džejms Kłepier papiaredziŭ, što chakiery, jakija pracujuć u intaresach zamiežnych dziaržaŭ, viaduć sačeńnie za kandydatami na post prezidenta ZŠA.
Pa słovach Kłepiera, najbolšuju niebiaśpieku ŭjaŭlajuć mienavita rasijskija i kitajskija chakiery, jakija mohuć nanieści najbolšuju škodu, bo vałodajuć bolšymi viedami, čym inšyja.
