Kaalicyja apazycyjnych partyj choča ŭdzielničać u vybarach i robić staŭku na temu kantrolu za ŭładaj.
Lidery apazycyi ŭ paniadziełak na admysłovaj pres-kanferencyi vykłali svaju pazycyju adnosna ŭdziełu ŭ sioletnich parlamenckich vybarach, a taksama prezentavali pasłańnie Abjadnanych demakratyčnych siłaŭ (ADS) da biełaruskaha narodu. Na nievialikim arkušy papiery farmatam A4 planava-analityčnaja hrupa ADS vykłała hałoŭnyja pałažeńni i mety ŭdziełu ŭ parlamenckich vybarach.
Hałoŭny mesydž, jaki apazycyjnyja kandydaty pavinny danieści da vybarcaŭ sioleta, zvodzicca da nastupnaj frazy: «Kantrol narodu nad uładaj daść ludziam novyja mahčymaści žyć lepiej».
Kaardynatar analityčna-planavaj hrupy Vacłaŭ Areška kaža, što padčas pracy nad dakumentam byli ŭzvažanyja mierkavańni absalutna ŭsich subjektaŭ ADS, pracavali ŭ ahulnaj hrupie i pradstaŭniki Ruchu «Za svabodu». «Raniej našy pasłańni da ludziej sychodzili z taho, što my abiacali pryjści da ŭłady, a ŭžo paśla źmianić sytuacyju ŭ krainie. Nievykanańnie abiacanaha ŭsprymałasia jak paraza. My abiacali piać krokaŭ da lepšaha žyćcia, ale vykonvaŭ ich užo Łukašenka. Siońnia my možam davać tolki realnyja abiacańni, jakija ŭ stanie vykanać, navat kali nas nie abiaruć deputatami. My prapanoŭvajem hramadzki kantrol nad dziejańniami ŭłady. Niezadavolenaść ludziej dziejańniami ŭłady ŭvieś čas uzrastaje. Uspomnicie tolki uviadzieńnie kantraktnaj systemy i admienu lhot. Ciapier rychtujecca školnaja reforma, jakaja taksama moža vyklikać niezadavolenaść. Ludzi nie biaruć u pryniaćci hetych ukazaŭ nijakaha ŭdziełu, nia mohuć niejak paŭpłyvać na sytuacyju. Temu kantrolu nad uładaj apazycyjnyja siły buduć ahitavać ciaham bližejšych hodu — dvuch, mahčyma, da prezydenckich vybaraŭ», — kaža V.Areška.
Staršynia Abjadnanaj hramadzianskaj partyi Anatol Labiedźka nazyvaje kankretnyja rečy, jakija apazycyja moža damahčysia ŭ vypadku ŭstalavańnia kantrolu na ŭładaj. «Pa-pieršaje, heta adsutnaść cieniavoha biudžetu i źmianšeńnie karupcyi ŭ krainie. Pa-druhoje, praviadzieńnie sudovaj reformy. Pa-treciaje, heta daść hramadztvu vybar, to bok, deputataŭ buduć abirać, a nie pryznačać. Pa-čaćviortaje, pieratvareńnie ŚMI ŭ realnuju čaćviortuju ŭładu. Usio zaležyć ad taho, ci zmožam my danieści naš mesydž da vybarcaŭ».
«Navat kali niekalki kandydataŭ projdzie ŭ pałatu pradstaŭnikoŭ, to heta ŭsio adno nia źmienić realnaj raskładki siłaŭ u respublicy, bo Łukašenka daminuje nad usimi halinami ŭłady. Naša siońniašniaje pasłańnie nosić pazytyŭny charaktar, bo maje ŭ sabie alternatyvu. My nia chočam narodu dla ŭłady, my chočam ŭładu dla narodu», — padkreśliŭ staršynia Partyi kamunistaŭ Siarhiej Kalakin.
Staršynia ahkamitetu Partyi pracy Alaksandar Buchvostaŭ ličyć, što dadzienaje pasłańnie vyražaje hałoŭnuju metu, što treba rabić, kab źmianić uładu.
Namieśnik staršyni Partyi BNF Vincuk Viačorka kaža, što bieskantrolnaja ŭłada pacichu zdaść niezaležnaść.
«Ułada časta spekuluje, što jana narodnaja. Ale, prabačcie, jana trymaje ludziej za bydła, jakoje znachodzicca na peryferyi pryniaćcia važniejšych rašeńniaŭ. Nam važna, kab ludzi ŭśviadomili, što nieabchodny kantrol nad uładaju. Tady na Kastryčnickuju płošču pačnuć vychodzić dziesiatki tysiač čałaviek», — kaža Anatol Labiedźka.
Dyk ci budzie tołk ad niekalki deputataŭ ad apazycyi, jakich Łukašenka moža dapuścić u pałatu pradstaŭnikoŭ? «Źjaŭleńnie demakrataŭ u parlamencie daść novy impuls u našaj baraćbie. Vielmi ciažka razburać systemu, nie znachodziačysia ŭ joj», — miarkuje A.Buchvostaŭ.
«Ja pierakanany, što nichto nia puścić apazycyju ŭ pałatu. Ale treba rabić usio mahčymaje, kab hetuju blakadu prabić. My budziem ihnaravać usie abmiežavańni, što robić ułada, nie bajučysia źniaćcia z vybaraŭ. Adnak iści na bajkot my nia majem prava», — kaža V.Viačorka.
Pa słovach Vacłava Areški, hetaje pasłańnie apazycyi budzie raspaŭsiudžvacca praź pieradvybarčyja materyjały budučych kandydataŭ u deputaty.
 |
