Prakuratura Minska 16 červienia sankcyjanavała źniavoleńnie pad vartu kiroŭcy 1986 hoda naradžeńnia, jaki tryma dniami raniej ździejśniŭ DTZ na Partyzanskim praśpiekcie, u vyniku jakoha adzin čałaviek zahinuŭ, a druhi atrymaŭ cialesnyja paškodžańni i znachodzicca va ŭstanovie achovy zdaroŭja.
Jak paviedamiła staršy pamočnik prakurora horada Natalla Kosač, kiroŭca padazrajecca ŭ ździajśnieńni złačynstva, praduhledžanaha č. 4 art. 317 KK (parušeńnie praviłaŭ darožnaha ruchu asobaj, jakaja kiravała transpartnym srodkam u stanie, vyklikanym užyvańniem narkatyčnych srodkaŭ, psichatropnych rečyvaŭ, što paciahnuła pa nieaściarožnaści śmierć čałavieka).
U momant DTZ paciarpiełyja pierasiakali prajeznuju častku pa rehulavanym piešachodnym pierachodzie na dazvalalny sihnał śviatłafora. Paśla najezdu na ich padazravany ździejśniŭ sutyknieńnie ź inšym aŭtamabilem.
Sankcyja č. 4 art. 317 KK praduhledžvaje pryznačeńnie asobie, jakaja ŭčyniła takoje złačynstva, pakarańnia ŭ vyhladzie pazbaŭleńnia voli na termin da siami hadoŭ z pazbaŭleńniem prava zajmać peŭnyja pasady abo zajmacca peŭnaj dziejnaściu. «Takoje dosyć surovaje dla nieaściarožnaha złačynstva pakarańnie abumoŭlena jak ciažaram nastupstvaŭ dadzienaha złačynstva, tak i stanam, u jakim jano ździajśniajecca», — adznačyła pradstaŭnica staličnaj prakuratury.
Nahadajem, dniom 13 červienia kiroŭca aŭtamabila «Folksvahien-Pasat», jaki ruchaŭsia pa Partyzanskim praśpiekcie z boku vulicy Kabuškina, na skryžavańni z vulicaj Šašejnaj najechaŭ na rehulavanym piešachodnym pierachodzie na mužčynu i maładoha čałavieka, paśla čaho sutyknuŭsia z aŭtamabilem «Chiondaj». Piešachody — minčuki, dziadula 1951 hoda naradžeńnia i ŭnuk 1997 naradžeńnia. Starejšy mužčyna zahinuŭ.
Pieršapačatkova pa fakcie DTZ była raspačataja sprava pa č. 2 art. 317 KK.
14 červienia śledčyja orhany paviedamili, što ŭ momant najezdu na piešachodaŭ kiroŭca znachodziŭsia ŭ stanie narkatyčnaha apjanieńnia. Taksama vyśvietliłasia, što ŭ pačatku červienia biahučaha hoda jon na adzin hod byŭ pazbaŭleny prava kiravańnia transpartnymi srodkami za pieravyšeńnie chutkaści.