Usiebiełaruski narodny schod nie moža być pryznany lehitymnym vyraźnikam voli biełaruskaha naroda, bo sfarmavany dyrektyŭna orhanami vykanaŭčaj ułady i nie źjaŭlajecca orhanam narodaŭładździa. Pra heta havorycca ŭ zajavie sojma Partyi BNF, pryniataj 18 červienia.
«U suviazi z tym što na tak zvanym narodnym schodzie buduć prysutničać tolki i vyklučna prychilniki ekanamičnaha i palityčnaha kursu dziejnaj ułady, hety orhan nie zdolny vykanać zadaču nacyjanalnaj kansalidacyi pierad abliččam aktualnych hieapalityčnych vyklikaŭ, ź jakimi sutykajecca naša kraina», — padkreślivajecca ŭ zajavie.
Sklikańnie napiaredadni parłamienckich vybaraŭ «niekanstytucyjnaha orhana, jaki zaklikany biez dyskusij i abmierkavańniaŭ uchvalać lubyja prapanovy ŭrada i prezidenta», na dumku Partyi BNF, «krasamoŭna śviedčyć pra adsutnaść demakratyi i parłamientaryzmu ŭ Biełarusi».
Zamiest «dekaratyŭnaha narodnaha schodu», zaznačajecca ŭ zajavie, biełarusam patrebnyja sapraŭdnyja instytuty nacyjanalnaj dziaržavy: sfarmavany na svabodnych i demakratyčnych vybarach parłamient, u jakim pradstaŭlenaje roznaje bačańnie raźvićcia krainy i roznyja palityčnyja płyni, uvasoblenyja ŭ palityčnych partyjach; adkazny pierad parłamientam urad; realnaja pravavaja dziaržava, jakaja dziejničaje va ŭmovach padziełu halin ułady.
Dla Partyi BNF, havorycca ŭ dakumiencie, jak dla partyi nacyjanalna-demakratyčnych kaštoŭnaściaŭ asnovatvornymi pryncypami źjaŭlajucca adstojvańnie nacyjanalnych intaresaŭ i vola biełaruskaha naroda.
«Adzinym lehitymnym dla ŭsiaho hramadstva sposabam vyjaŭleńniem voli naroda źjaŭlajucca vybary. Mienavita praviadzieńnie svabodnych i spraviadlivych vybaraŭ u adpaviednaści ź biełaruskim zakanadaŭstvam i pry vykanańni ŭmoŭ roŭnaści kandydataŭ budzie aznačać viartańnie ŭ Biełaruś sapraŭdnaha parłamientaryzmu i narodaŭładździa», — padkreślivajecca ŭ zajavie.
Piaty Usiebiełaruski narodny schod adbudziecca 22—23 červienia ŭ Minsku. Na jaho abmierkavańnie buduć vyniesienyja asnoŭnyja pałažeńni Prahramy sacyjalna-ekanamičnaha raźvićcia Respubliki Biełaruś na 2016—2020 hady.
Parłamienckija vybary ŭ Biełarusi adbuducca 11 vieraśnia.
