U horadzie Akinava na adnajmiennaj vyśpie raście kolkaść biespracoŭnych — bary, restarany i kłuby zvalniajuć ludziej.
Łakalny ekanamičny kryzis vyklikany tym, što amierykanskaje kamandavańnie miascovaj vajennaj bazy vyrašyła pryniać žorstkija miery dla zmahańnia z pjanaj złačynnaściu siarod asabovaha składu.
examiner.com
Pryčynaj zachadaŭ stała žorstkaje zabojstva 20-hadovaj japonki Ryny Šymabukura ŭ krasaviku hetaha hoda. Dziaŭčyna źnikła, a ŭ mai jaje cieła było znojdzienaja. Potym japonskaja palicyja aryštavała byłoha žaŭniera amierykanskaj marskoj piachoty pa abvinavačańni ŭ hvałcie i zabojstvie.
Mnohija amierykancy znachodziać tut žonak ci pa inšaj pryčynie zastajucca žyć u Japonii paśla słužby. Adnak ich praviny i złačynstvy navat u novym statusie bjuć pa reputacyi byłoj Radzimy.
ZŠA ŭviali «pieryjad adzinstva i žałoby», jaki praciahvajecca ŭžo bolš za miesiac, piša aficyjnaja armiejskaja hazieta stripes.com.
Usim vajskoŭcam ZŠA niezaležna ad ranhu zabaroniena nabyvać ałkahol pa-za terytoryjaj vajennaj bazy. Paźniej amierykanski fłot zabaraniŭ svaim amal 19 000 marakam i aficeram va ŭsioj Japonii spažyvać ałkahol i na čatyry dni ŭvohule sychodzić z vajennych baz. Choć praz 11 dzion abmiežavańni byli častkova admienienyja, marakam usio roŭna zabaroniena kuplać ałkahol pa-za terytoryjaj vajskovych čaściej.
U toj čas jak hetyja praviły radykalna skaracili kolkaść avaryj i incydentaŭ, źviazanych z ałkaholem, mocna paciarpieli miascovyja biznesmieny i ich supracoŭniki.
«85% našych klijentaŭ - vajskoŭcy. I, kali ščyra, heta, mahčyma, minimalnaja acenka. Pa piatnicach uviečary tut miesca niama. Adnak ja vymušany zvalniać ludziej, kab vyžyć», — adznačyŭ mieniedžar bara Red Kitchen and Cafe Radryha Vatanabe.
japantimes.co.jp
Susiedni bar Black Rose prosta zakryŭsia na miesiac, kab pieračakać hnieŭ amierykanskich hienierałaŭ.
«Takoje było i raniej, adnak zvyčajna zabarony byli abmiežavanyja pa časie. Ciapier hetaha niama. Kali jany praciahnucca, my naŭrad ci zmožam płacić supracoŭnikam», — kaža Juta Išyvata, uładalnik paba Jammin, jakoha cytuje japantimes.co.jp.
Ci nie samy hučny rozhałas i pytańni nakont patreby mieć amierykanskija bazy na japonskaj terytoryi vyklikali padziei 1995 hoda na Akinavie, kali troje amierykanskich vajskoŭcaŭ skrali i zhvałcili japonskuju 12-hadovuju dziaŭčynku.
news-images.vice.com
ZŠA pieradali ich japonskamu sudu, jaki prysudziŭ im 7 hod źniavoleńnia z vypłataj kampiensacyi achviary.
«Zvyčajna u nas za vychadnyja kala 1500 klijentaŭ. Spadziajusia, što zabaronu admieniać da Dnia Niezaležnaści 4 lipienia», - kaža saŭładalnik bara Paddy Mac's Irish Rajan Chejmi, były siaržant amierykanskaj avijacyi.
Rajan vyrašyŭ vykarystać pieryjad dla ramontu i źmieny afarmleńnia svajho bara.
