Dom i kałodziež, dzie zdaryłasia trahiedyja
Uviečary 28 červienia žychar Krupskaha rajona spuściŭsia ŭ kanalizacyjny kałodziež hłybinioj kala 6 mietraŭ pobač sa svaim domam dla jaho pračystki. U chodzie raboty mužčyna straciŭ prytomnaść i ŭpaŭ na dno. Jon pracavaŭ rabočym na hazakampresarnaj stancyi.
Akazać dapamohu mužčynu sprabavali susiedzi. Troje mužčyn pa čarzie spuskalisia ŭ kałodziež z metaj akazańnia dapamohi papiarednim i, hublajučy prytomnaść, padali ŭniz.
«U niejki momant jaho žonka padniała tryvohu. U Kamiency žyvie kala 500 čałaviek, mnohija źbiehlisia na dapamohu. Tam ža ŭsia vulica — pryvatnyja damy. Ratavać Siarhieja chłopcy leźli adzin za adnym. Adzin ź ich piensijanier - 65 hadoŭ. Inšy pryjechaŭ z Krupak da cieścia ŭ adpačynak… Pa čarzie ŭ kałodziež na dapamohu Siarhieju spuskalisia try čałavieki i, hublajučy prytomnaść, padali ŭniz. Usie zahinuli».
Pra Siarhieja miascovyja kažuć tolki dobraje. Naradziŭsia i žyŭ u Kamiency. Kali ažaniŭsia, kupiŭ dom na susiedniaj z baćkami vulicy. Jamu było 43 hady. Pracavaŭ rabočym na hazakampresarnaj stancyi. Z žonkaj vychoŭvali dźviuch dačok-školnic.
Dla akazańnia dapamohi paciarpiełym na miesca zdareńnia prybyli supracoŭniki MNS. Jany dastali cieła čaćviarych mužčyn biez prykmiet žyćcia z kanalizacyjnaha kałodzieža. Miedycynskija rabotniki kanstatavali ich śmierć.
Anatol Hančar, namieśnik staršyni rajvykankama pa budaŭnictvie pakazvaje toj kałodziež
Ihar Časnok, staršynia rajvykankama
— Kali ratavalniki dastali pieršaha čałavieka, dla apieratyŭnaha akazańnia dapamohi pakinutym, ryzykujučy žyćciom, uniz spuścilisia rabotniki Krupskaha rajonnaha adździeła pa nadzvyčajnych situacyjach lejtenant unutranaj słužby Alaksandr Šymanski i staršyna ŭnutranaj słužby Andrej Śliborski, - raspaviali ŭ MNS.
Andreju Śliborskamu było 26 hadoŭ, fota z sacyjalnych sietak
Pry praviadzieńni vyratavalnych rabot dvoje supracoŭnikaŭ MNS atrymali atručeńnie parami hazaŭ i byli špitalizavany. Paźniej, nie prychodziačy ŭ prytomnaść, jany pamierli ŭ balnicy.
- Śledčym kamitetam vyśviatlajucca abstaviny hibieli šaści čałaviek u Krupskim rajonie. Zaviedziena kryminalnaja sprava za pryčynieńnie śmierci pa nieaściarožnaści, — paviedamili ŭ SK.
Praviedzieny ahlad miesca zdareńnia z udziełam śpiecyjalistaŭ Dziaržaŭnaha kamiteta sudovych ekśpiertyz, MNS, milicyi. Kanfiskavanyja ŭzory rečyvaŭ, jakija źmiaščajucca ŭ kałodziežy, u tym liku ažyćcioŭleny zabor pavietra dla praviadzieńnia chimičnych daśledavańniaŭ.
