«My stavim zadaču pryjści da cen, blizkich da ŭnutryrasijskich, — skazaŭ jon. — Ja zaŭsiody svaim kaleham, kali nieadnarazova, dziasiatki razoŭ užo sprečki pa canie hazu, pa formułach, pa ŭsim i hetak dalej, ja kažu:» Nam nie patrebny tanny haz ad vas, my pajšli ŭ Jeŭrazijski sajuz dla taho, kab mieć haz i enierharesursy ŭ cełym pa cenach, blizkich da vašych».
Pavodle słoŭ vice-premjera, jon «budzie radavacca», kali ŭ Rasii ceny buduć nabližanyja da zachodniejeŭrapiejskich. Kali roźnica ŭ cenach dla rasijskich i biełaruskich spažyŭcoŭ składzie 10—15%, — «heta dla našaj ekanomiki karysna», skazaŭ Siamaška. «Siońnia subjekty haspadarańnia Rasii płaciać 60-65 dołaraŭ, u Kazachstanie — 70-72 dołary, a nam treba płacić 278 dołaraŭ», — dadaŭ jon.
Jak paviedamlałasia raniej, Minsk nastojvaje na źnižeńni koštu rasijskaha hazu. 31 maja namieśnik staršyni praŭleńnia «Hazproma» Alaksandr Miadźviedzieŭ paviedamiŭ, što doŭh Biełarusi za spažyty rasijski haz raście i ŭžo pieravysiŭ 200 młn. dołaraŭ. «Jość niepłaciažy <…> z boku biełaruskich spažyŭcoŭ. Užo tam suma nazapasiłasia vielmi i vielmi surjoznaja — užo bolš za 200 młn. dołaraŭ», — skazaŭ jon. Pradstaŭnik «Hazproma» vykazaŭ zdahadku, što biełaruskija spažyŭcy «nie sami pa sabie vyrašyli tak płacić, a im niechta padkazaŭ». «Mnie zdajecca, heta nie najlepšy sposab», — dadaŭ Miadźviedzieŭ.
U pačatku maja stała viadoma, što AAT «Hazprom transhaz Biełaruś» źviarnułasia ŭ mižnarodny arbitražny sud pry Biełaruskaj handlova-pramysłovaj pałacie ź iskam u dačynieńni da biełaruskich hazazabieśpiačalnych arhanizacyj «u suviazi z najaŭnaściu zapazyčanaści z boku hazazabieśpiačalnych arhanizacyj pa apłacie pastaŭlenaha pryrodnaha hazu».
Mahčymaść źnižeńnia dla Biełarusi cany na pryrodny haz, a taksama situacyja vakoł zapazyčanaści za pastaŭlenyja resursy abmiarkoŭvalisia 29 maja na sustrečy vice-premjeraŭ Rasii i Biełarusi Arkadzia Dvarkoviča i Uładzimira Siamaški. Pavodle jaje vynikaŭ Dvarkovič paviedamiŭ, što «prahresu niama».
Raniej ministr enierhietyki RF Alaksandr Novak zajaŭlaŭ, što najaŭnaja cana pastavak rasijskaha hazu dla Biełarusi składaje 132 dołary za tysiaču kubamietraŭ. Zhodna sa źviestkami rasijskaha Minenierha, doŭh Biełarusi pierad «Hazpromam» za pieršyja čatyry miesiacy 2016 hoda składaŭ bolš za 125 młn. dołaraŭ.
U svaju čarhu ministr enierhietyki Biełarusi Uładzimir Patupčyk i Uładzimir Siamaška admaŭlali najaŭnaść doŭhu. Patupčyk zajaŭlaŭ, što Biełaruś ličyć spraviadlivaj canu 73 dołary za tysiaču kubamietraŭ hazu. Jon taksama padkreślivaŭ, što biełaruski bok «kaža nie pra skidku, a pra rynkavyja roŭnadachodnyja ceny».
