Sustaršynia arhkamiteta pa stvareńni partyi «Biełaruskaja chryścijanskaja demakratyja» Pavieł Sieviaryniec 30 červienia aštrafavany sudom Maskoŭskaha rajona Minska za ŭdzieł u akcyi salidarnaści z Eduardam Palčysam, jakaja prajšła 9 červienia, na 50 bazavych vieličyń (10,5 młn rubloŭ).
Jak paviedamiŭ Sieviaryniec, rašeńnie sud pryniaŭ zavočna, bo sam jon na sudovym pasiadžeńni nie prysutničaŭ.
9 červienia Sieviaryniec i jašče siem aktyvistaŭ praviali ŭ Minsku akcyju salidarnaści z zasnavalnikam sajta 1863ch.com Eduardam Palčysam (psieŭdanim Džon Silvier), jaki ŭtrymlivajecca ŭ staličnym SIZA-1.
Ranicaj 30 červienia pa abvinavačańni ŭ parušeńni paradku arhanizacyi abo praviadzieńnia masavych mierapryjemstvaŭ adbylisia sudy i nad inšymi ŭdzielnikami akcyi.
Aktyvist Abjadnanaj hramadzianskaj partyi Dzianis Kraŭčuk aštrafavany na 25 bazavych vieličyń (5,25 młn rubloŭ), aktyvistka i pravaabaronca Natalla Haračka-Basałyha — na 50 bazavych vieličyń.
Pradstaŭnika AHP Antona Žyłko asudzili 27 červienia, pryznačyŭšy pakarańnie ŭ vyhladzie štrafu ŭ 50 bazavych vieličyń.
Redaktar sajta www.1863x.com Eduard Palčys byŭ zatrymany na terytoryi Rasii i 26 maja ekstradavany ŭ Biełaruś. Jon abvinavačvajecca pa č. 1 art. 130 (raspalvańnie rasavaj, nacyjanalnaj albo relihijnaj varožaści) i č. 2 art. 343 (raspaŭsiudžvańnie parnahrafičnych materyjałaŭ) Kryminalnaha kodeksa.
