Ale spartyŭnyja čynoŭniki, kali padniaŭsia šum, ŭsio ž apomnilisia i znajšli finansavańnie na pajezdku Hurkova. Paŭstała dylema, na jakuju ž karysnuju spravu nakiravać hrošy, sabranyja zvyčajnymi biełarusami.
«Chaču ščyra padziakavać usim ludziam, jakija mianie padtrymali. Sabranyja hrošy ja pieradaju u svoj rodny kłub «Patryjot». Ciapier zała znachodzicca ŭ žudasnym stanie. Adnak tut trenirujucca nie tolki dziejnyja spartoŭcy, ale i šmat dzietak. Treba rychtavacca da vieraśnia i stvaryć u zale narmalnyja ŭmovy dla trenirovak», — tłumačyć čempijon śvietu.
Spartovy kłub «Patryjot» mieścicca ŭ padvale chruščoŭki pa vulicy Vałhahradskaj u Minsku, heta hramadskaje abjadnańnie. Tut byli padrychtavanyja bajcy suśvietnaj značnaści, ale tajbaksiory nie atrymlivajuć niejkich značnych subsidyj ad dziaržavy. Muaj-taj źjaŭlajecca adnym z samych masavych adzinaborstvaŭ na płaniecie, ale nie ŭvachodzić u alimpijskuju prahramu.
«Tamu my robim ramont svaimi namahańniami, svaimi rukami. Sabranyja hrošy dapamohuć nam stvaryć naležnyja ŭmovy dla padrychtoŭki novych čempijonaŭ», — spadziajecca Hurkoŭ.
Nahadajem, što prajekt «Narodny čempijon» zapuścili na sajcie talaka.by u siaredzinie krasavika. Tady ŚMI daviedalisia, što pajezdka Hurkova na čempijanat płaniety akazałasia pad pytańniem. Bajcu, jaki aktyŭna padtrymlivaje biełaruskuju kulturu i vystupaje ŭ składzie hurta Brutto, dziaržava pierastała płacić zarpłatu.
Jak raspavioŭ sam Hurkoŭ, kiraŭnictva Biełaruskaj fiederacyi muaj-taj i kikboksinhu zmusiła jaho admovicca ad staŭki ŭ Minsporta. Tamu adpraŭlać čempijona na płanietarny forum u šviedski Jenčopinh čynoŭniki nie śpiašalisia. Bolš za toje, hučali zajavy, što z-za ŭdziełu ŭ Brutto heta ŭžo zusim nie toj lehiendarny Hurkoŭ.
Jak tolki infarmacyja pra skandał trapiła ŭ ŚMI, na sajcie talaka.by byŭ adkryty zbor srodkaŭ na pajezdku Hurkova ŭ Šviecyju. Nieabchodnaja suma (kala 62 miljonaŭ) była sabranaja ciaham niekalkich hadzin.
Paśla hetaha čynoŭniki dali zadniuju pieradaču i znajšli hrošy na pajezdku ŭ dziaržbiudžecie. Hurkoŭ vystupiŭ na čempijanacie śvietu tryumfalna. U finale jon «pabiŭ» adnaho z topavych tajskich prafiesijanałaŭ Ekapchana Sambunsaaba, jaki nie prajhravaŭ ciaham čatyroch hadoŭ.
Niekatoryja achviaravalniki adklikali hrošy z prajekta «Narodny čempijon», ale ŭsio adno na rachunku zastałosia bolš za 45 miljonaŭ rubloŭ.
Sustreča Hurkova z zaŭziatarami, jakija pryniali ŭdzieł u prajekcie «Narodny čempijon», prajšła 5 lipienia ŭ Minsku.
