Namieśnik načalnika ŭpraŭleńnia infarmacyi i hramadskich suviaziaŭ MUS Biełarusi Hieorhij Jeŭčar padzialiŭsia padrabiaznaściami zatrymańnia futbalista «Ašmianaŭ» Siarhieja Bułynienka.
— Vy ŭžo skazali pra toje, što nie było źbićcia futbalista, a było siłavoje zatrymańnie. Moža być, užo vyśvietlili, adkul u jaho traŭmy, ź jakimi jon apynuŭsia ŭ lakarni?
— Pa hetym fakcie pravodzicca pravierka. Ale ja jašče raz paŭtaru: termin «źbićcio» aznačaje, što čałavieka źbivajuć. Tut ža było siłavoje zatrymańnie, a taksama spynieńnie supraćpraŭnych dziejańniaŭ, jakija vyjaŭlałasia ŭ vyhladzie akazańnia supracivu supracoŭnikam pravaachoŭnych orhanaŭ.
— To bok možna skazać, što traŭmy atrymanyja ŭ vyniku siłavoha zatrymańnia?
— Tak, traŭmy atrymanyja ŭ vyniku siłavoha zatrymańnia. A fraza «źbićcio supracoŭnikam milicyi» absalutna nie adpaviadaje rečaisnaści. Sprava ŭ tym, što padčas siłavoha zatrymańnia byvajuć momanty pryčynieńnia cialesnych paškodžańniaŭ.
Bolš za toje, baćkam futbalista ad imia kiraŭnictva HUBAZiK na nastupny dzień byli pryniesieny prabačeńni.
— Skažycie, jaki stan supracoŭnika milicyi, jakoha udaryŭ futbalist? Jon moža ciapier vykonvać svaje abaviazki?
— Moža.
- I jašče adno pytańnie. Jość niestykoŭka: u vašym kamientary dla «Panaramy» vy kažacie ab adnym ŭdary nahoj u hrudzi supracoŭnika milicyi, a ŭ aficyjnym pres-relizie MUS skazana pra toje, što futbalist «niekalki razoŭ nanios udar nahami ŭ hrudzi supracoŭniku śpiecpadraździaleńnia». Dzie było skazana pravilna?
— Nu, davajcie aryjentavacca na aficyjny pres-reliz. Ale sens ža adzin i tam, i tam: byŭ akazany supraciŭ, tamu ŭžytaja fizičnaja siła, — skazaŭ Jaŭčar.
