U sudzie Centralnaha rajona praciahvajuć ahučvać piśmovyja materyjały spravy, u pryvatnaści pierapisku Kaźbieka Japryncava ź jaho siabram i partnioram Alaksandram Arabianam. U razmovach za pieršaje paŭhodździe 2013 havorka, u asnoŭnym, idzie pra toje, jak viarnuć daŭhi i zaručycca padtrymkaj Japryncava-starejšaha.
Kaźbiek Japryncaŭ.
«Realna my tut u kasiaku, — piša Arabian 8 studzienia. — Tupa ŭziali babki i nie addajem. Ciapier pa $30 miljonach telefanavać buduć».
Situacyja, miarkujučy pa abmierkavańni, abvastrajecca z kožnym dniom. Ale spynicca biźniesmieny nie mohuć i nabirajuć usio novyja i novyja abaviazki. Raźličvajuć, što hučnaje imia baćki i kampanii «Trajpł» vyrašyć usie pytańni.
«Realna, brat, tolki ty možaš ŭsich supakoić jak syn UH [Uładzimira Hienadzieviča Japryncava — «NN»]. Mianie ŭžo nichto nie słuchaje», — kaža Arabian.
«Jon nie viedaje naohuł ničoha, — piša Kaźbiek ŭ pačatku 2013 hoda. — Kali vyrulim bieź jaho, prydumajem, jak piśmienna ŭsio skazać. Hałoŭnaje — vykiravać».
Dalej Arabian kaža, što prydumaŭ schiemu, jak možna vyjści sa składanaj situacyi, atrymać $50 miljonaŭ.
— UH daviadziecca za hetuju schiemu paručycca, — papiaredžvaje jon. — Jany nam kinuć babki na pieradapłatu.
— Na 50 miljonaŭ ja baćku nie padstaŭlu, — adkazvaje jamu Kaźbiek.
— Nu jak by na 27 miljonaŭ užo jość ulot, — nahadvaje Alaksandr Arabian.
Damovy źmiaščali pad harantyi «Trajpła», pra heta siabry nieadnarazova ŭspaminajuć u razmovach. U pierapiscy fihuruje proźvišča Batvinki, namieśnika Čyža.
«Baćka padymaje kipiš pa babkach, — piša Kaźbiek. — Jon sa mnoj tak nikoli nie razmaŭlaŭ. Batvinka taksama telefanuje ŭ isterycy».
Vierahodniej za ŭsio, Batvinku jak śviedku vykličuć u sud. U zajavie paciarpiełaha Rabceviča jon ŭkazany razam ź Japryncava.
Ci viedaŭ Jury Čyž pra finansavyja apieracyi Kaźbieka i jaho armianskaha siabra?
«Čyž vyklikaŭ da siabie Batvinku, pytaŭsia, što vy tam pradajecie z Kaźbiekam, što ŭ vas takija daŭhi», — ŭkazvaje ŭ adnym z hutarak Arabian.
Miarkujučy pa ahučanych na dadzieny momant razmovach, mazhavym centram u hetym tandemie byŭ Alaksandr Arabian. Kaźbiek adkazvaŭ za suviazi, za prykryćcio z boku baćki.
«Nielha ž jaho padstaŭlać, jon hetaha nie vytrymaje. Ja siabie adčuvaju jak apošni čałaviek [niecenzurnaje], — pisaŭ jon Arabianu. — Nadakučyła ŭsim chłusić, užo chočacca pryznacca. Jon infarkt atrymaje, kali daviedajecca ŭsio. Pra toje, što ŭ pavietra vydatkavana $25—30 miljonaŭ. Jon heta nie vytrymaje».
Z kantekstu razmovy niezrazumieła, pra jakija mienavita $30 miljonaŭ idzie havorka — ab abaviazkach pierad partniorami abo pra hrošy, jakija Kaźbiek prajhraŭ na «Foreksie». Paciarpieły Rabcevič raniej nazyvaŭ mienavita hetuju sumu — $30 miljonaŭ.
Naŭrad ci Uładzimir Japryncaŭ znachodziŭsia ŭ poŭnym niaviedańni. Časam jon usio ž taki vyklikaŭ da siabie i Kaźbieka, i Alika, pytaŭsia, jak jany zakryvajuć daŭhi.
«Brat, baćka na mianie hladzić jak na voraha naroda, — kazaŭ Kaźbiek Arabianu.
«Vysłuchaŭ paŭhadzinny kryk ad UH, — adkazvaŭ jamu Arabian. — Pytaŭsia, kolki daŭhoŭ. Trochi nakaciŭ na Baćvińnie (majecca na ŭvazie Uładzimir Batvinka, namieśnik hiendyrektara «Trajpła») Pierad UH. Heta adziny byŭ varyjant».
Japryncaŭ-starejšy vyhladaje na sudzie pryhniečanym, pieryjadyčna zapisvaje štości ŭ sšytak, kali prakuror začytvaje repliki ź pierapiski Kaźbieka i Alika. Apošnija vyhladajuć aptymistyčniej. Na niekatorych momantach jany navat śmiajucca, kali havorka zachodzić pra žarty, jak jany buduć prybirać lišnich ludziej na svaim šlachu.
Siabry, kalehi i rodnyja kožny dzień prychodziać u sud, kab padtrymać abvinavačanych.
