Adkryty aŭkcyjon pa prodažy domu tvorčaści «Isłač» pieraniesieny na 10 červienia.
Praviadzieńnie adkrytaha aŭkcyjonu pa prodažy abjektaŭ, jakija ŭvachodziać u skład majomasnaha kompleksu ŭstanovy Sanatoryj-prafilaktoryj piśmieńnikaŭ «Isłač» (Dom tvorčaści piśmieńnikaŭ), pryznačanaje na 26 traŭnia, pieranosicca na 10 červienia 2008. Pra heta paviedamiła likvidacyjnaja kamisija HA «Biełaruski litaraturny fond».
Rasprodaž adbudziecca ŭ Miensku, u aktavaj zali Dziaržkamu majomaści, arhanizatara aŭkcyjonu.
Na prodaž vystaŭlajucca hałoŭny korpus Doma piśmieńnikaŭ – trochpaviarchovy budynak, sprajektavany architektaram Hradavym, žyłyja, haspadarčyja j słužbovyja budynki, finskaja łaźnia, draŭlanaje KPP, pompavaja stancyja, inženiernyja sietki, darožnyja pakryćci, małyja architekturnyja formy, ciaplica…
Dom tvorčaści piśmieńnikaŭ znachodzicca ŭ Vałožynskim rajonie kala miastečka Rakaŭ, na bierazie raki Isłač, na ŭčastku płoščaj 18 ha.
Pačatkova kožny łot aŭkcyjonu aceńvajecca na miljon amerykanskich dalaraŭ.
U minułym hodzie, adabraŭšy ŭ Sajuzu biełaruskich piśmieńnikaŭ pamiaškańnie, sudovyja instancyi ŭzialisia j za HA «Biellitfond».
HA «Biellitfond» – spadkajemca Litfondu SSSR, zasnavanaha na bazie Litaraturnaha fondu, statut jakoha pisaŭ jašče Leŭ Tałstoj. Jak paviedamlali ŚMI, dla pryniaćcia vyrašeńnie pra likvidacyju abjadnańnia, sudździ Viarchoŭnaha sudu Valerju Samaluku spatrebiłasia 10 chvilin.
