Alimpijada daŭno vyjšła za ramki asabistych spartyŭnych dasiahnieńniaŭ - heta vialikaja palityka i vialiki honar dziaržavy. Ab hetym zajaviŭ kiraŭnik Biełarusi, prezident Nacyjanalnaha alimpijskaha kamiteta Alaksandr Łukašenka siońnia na ŭračystych pravodzinach biełaruskaj spartyŭnaj delehacyi na XXXI letnija Alimpijskija hulni ŭ Rya-de-Žanejra.
«Pamiatajcie, što vašy vysokija rezultaty - heta pazityŭny imidž Biełarusi i pakazčyk jaje paśpiachovaha raźvićcia», - padkreśliŭ kiraŭnik dziaržavy.
«Dla biełaruskich atletaŭ hetyja Hulni stanuć samym važnym ekzamienam čatyrochhodździa. Naša dziaržava zrabiła ŭsio nieabchodnaje, kab vy mieli mahčymaść spakojna padrychtavacca i dastojna vystupić na hetych spabornictvach», - skazaŭ biełaruski lidar.
Alaksandr Łukašenka adznačyŭ, što cana alimpijskaha miedala zaŭsiody była vysokaja, i siońnia tym bolš. «Pahladzicie, jak abvastryłasia kankurentnaja baraćba. Časta vykarystoŭvajucca niespartyŭnyja mietady nacisku na asobnych atletaŭ i cełyja krainy. Užo nie vyklikajuć ździŭleńnia skandały, hučnyja vykryćci, pierahlad vynikaŭ spabornictvaŭ, jakija daŭno adyšli ŭ historyju, - zaŭvažyŭ jon. - Vy ŭsio heta bačycie sami, razumiejecie, upeŭnieny, pieražyvajecie. U Rya ŭmovy dla spabornictvaŭ buduć niaprostymi, mahčyma, ciažkimi. Upeŭnieny, vy spraviciesia z hetym kałasalnym napružańniem i pakažacie dastojny vynik».
Kiraŭnik dziaržavy adznačyŭ, što atletaŭ buduć padtrymlivać nie tolki blizkija ludzi, ale i ŭsia kraina. «Vy lepš za inšych adčuvajecie, nakolki važny vašy pieramohi dla ŭsich biełarusaŭ», - skazaŭ jon.
Na hety raz spartsmienam nie ŭstanaŭlivali miedalnych płanaŭ.
Razam z tym kraina maje prava čakać ad kožnaha poŭnaj kancentracyi i samaaddačy na miažy čałaviečych mahčymaściej, adznačyŭ Prezident. «My ŭsie čakajem vašych pieramoh. Naša kamanda - heta arhaničny spłaŭ maładości i vopytu. Dla adnych heta pieršaja ŭ žyćci Alimpijada, ale mnohija ŭžo vystupali na hałoŭnych hulniach čatyrochhodździa», - skazaŭ biełaruski lidar.
Asobna kiraŭnik dziaržavy vykazaŭ udziačnaść biełaruskim baskietbalistkam, dziakujučy jakim na Alimpijskich hulniach 2016 hoda Biełaruś znoŭ budzie pradstaŭlena ŭ hulniavych kamandnych vidach sportu.
«Dumaju, što mužykam treba raŭniacca na našych dziaŭčat», - skazaŭ Alaksandr Łukašenka.
«My spadziajomsia na pieramohi biełaruskich atletaŭ. Vy akuniaciesia ŭ mora lubvi i ŭvahi z boku našych udziačnych balelščykaŭ. Nie mienš važna, što i dziaržava pa zasłuhach acenić kožnaje paśpiachovaje vaša vystupleńnie. Ja budu vielmi rady, kali heta Alimpijada daść nam padstavu hetak ža ŭračysta, pierad usim narodam padvieści jaje vyniki i ŭručyć zasłužanyja ŭznaharody ŭsim, chto kuje alimpijskuju słavu krainy», - reziumavaŭ biełaruski lidar.-
