Adziny ŭ Biełarusi pryvatny muziej pobytu pieražyvaje niaprostyja časy.
Muziej mieścicca ŭ zvyčajnym žyłym domie pa vulicy Lermantava, niedaloka ad histaryčnaha centra Horadni, pablizu Kałožskaha parku. Jaho zasnavalnik Januš Parulis, patomny haradzieniec i kalekcyjanier, adkryŭ muziej faktyčna na ŭłasnaj žyłpłoščy. Tam raźmiaściłasia pieršaja jaho častka. Druhaja naležyć dziaržavie. Jana arandujecca pad muziej, ci, chutčej, skład nieacennych ekspanataŭ historyi našaha horada. Ich tak šmat, što ledź chapaje miesca stvarać asobnyja ekspazicyi. Z-za taho, što pałova doma naležyć dziaržavie, a naviedvalnikaŭ prychodzić mała, davodzicca addavać za arendu ŭsiu piensiju. Časam i bolš, davodzicca pradavać asobnyja ekspanaty kalekcyi.
«Ja starajusia pradavać tolki tyja rečy, jakich u mianie pa dźvie, ale i heta rablu nieachvotna, bo pradajucca jany zusim nie za tyja hrošy, jakich kaštujuć. Za biescań, — pryznajecca Januš. — Kali tak praciahniecca dalej, mnie daviadziecca ŭvohule admovicca ad hetaj zadumy i całkam raspradać kalekcyju».
Vidavočna, padobny muziej stanoŭča paŭpłyvaŭ by na imidž horada. Ale dziecišča Januša Parulisa nie znachodzić padtrymki ni ad pryvatnych, ni ad dziaržaŭnych arhanizacyj. A im ža zakładzieny padmurak dla stvareńnia nie prosta muzieja, a cełaha muziejnaha kompleksu. Na prylehłaj da doma terytoryi jość jašče niekalki pabudoŭ, jakija, pa raźlikach uładalnika, mahli b pieratvarycca ŭ halereju i kafe.
Źviartajemsia da ŭsich nieabyjakavych ludziej! My ŭžo nie prosim stanavicca pastajannym sponsaram muzieja — prosim prosta nabyć u muziej kvitok za niekalki rubloŭ. Prychodźcie — i vy nie paškadujecie! Znajdzicie kryšačku volnaha času, i atrymanyja emocyi zastanucca z vami na doŭhi čas!
Šukajcie niezvyčajnaje miesca dla praviadzieńnia fotasiesij? Niešta niezvyčajnaje, kazačnaje, što dychaje historyjaj?
Muziej historyi pobytu haradziencaŭ — biełarusaŭ, palakaŭ, ruskich, habrejaŭ — usich tych, chto niekali žyŭ i rabiŭ naša z Vami siońnia! Usie pradmiety muzieja aŭtentyčnyja — kožny pradmiet maje svaju historyju, kožny pradmiet možna pamacać, patrymać u rukach ci navat kupić, a niekatoryja rečy možna prymiarać (naprykład, dla taho, kab zrabić vydatnaje sełfi).
Muziej «U Januša» čakaje vas: horad Hrodna, vuł. Lermantava, 25.
