Hałoŭny redaktar i stvaralnik najvialikšaha ŭ Centralnaj i Uschodniaj Eŭropie štodziońnika «Gazety Wyborczej», lehiendarny apazycyjaner Adam Michnik, jaki ŭžo praciahły čas nie daje nikomu interviju i nie vystupaje publična, pahadziŭsia prakamentavać biełaruskaj «Svabodzie» padziei ŭ Biełarusi. Sa spadarom Michnikam razmaŭlaŭ varšaŭski karespandent Radyjo Svaboda.
Adam Michnik davoli pilna sočyć za tym, što adbyvajecca va ŭschodnich susiedziaŭ Polščy – ja zapytaŭsia, jak jon bačyć budučyniu Biełarusi?
(Michnik: ) «Ja baču budučyniu Biełarusi dobraj. Biełaruskaja demakratyčnaja apazycyja pakazała i ŭsioj Biełarusi, i ŭsiamu śvietu, što patencyjał imknieńnia da svabody ŭ biełarusaŭ vialiki i što dni dyktatury paličanyja. Ciažka skazać dakładna, kali i jak dyktatura padzie – u roznych krainach heta adbyvałasia pa-roznamu i zaŭsiody niečakana. Ale adna ahulnaja reč zaŭsiody była – tam byli siły, jakija imknulisia da demakratyi. Hetam razam biełarusy pakazali, što ŭ Biełarusi takija siły jość. Heta samaje važnaje».
Palaki vielmi aktyŭna padtrymali biełaruskija demakratyčnyja siły ŭ časie minułych vybaraŭ – heta tyčycca i ŭładaŭ i zvyčajny hramadiaznaŭ. Jakaja, na dumku Adama Michnika, pavinna być rola Polščy ŭ demakratyzacyi Biełarusi?
(Michnik: ) «Ja spadziajusia, što razumnaja zamiežnaja palityka Polščy, jakaja palahaje ŭ padtrymcy demakratyčnnych pamknieńniaŭ biełarusaŭ, budzie praciahvacca. Palaki zrazumieli, što čym bolš svabody budzie ŭ biełaruskaj dziaržavie, tym bolš harantyjaŭ dla demakratyi budzie i ŭ samoj Polščy».
Ci varta biełaruskim demakratam raźličvać na ŭzmacnieńnie damamohi ci ŭcisku na aficyjnyja ŭłady z Zachadu?
(Michnik: ) «Raźličvać zaŭsiody lepš na samaho siabie. Ale abaviazak demakratyčnych zachodnich dziaržavaŭ – dapamahčy biełaruskaj demakratyi nastolki, nakolki heta mahčyma. Ale niama havorki, kab zvonku biełarusaŭ da niečaha zmušać. Pytańnie ab budučyni Biełarusi pavinny vyrašyć sami biełarusy».
«Gazeta Wyborcza» vielmi šmat piša pra Biełaruś, drukuje artykuły biełaruskich žurnalistaŭ i kamentary admysłoŭcaŭ ź Biełarusi. Ci heta budzie praciahvacca?
(Michnik: ) «Spadziajusia, što tak!»
