Kamunisty nie acanili apošniuju stužku Styvena Śpiłberha.
Jak paviedamlaje sajt kamunistaŭ Pieciarburhu i Leninhradzkaj vobłaści “členy Mižrehijanalnaj arhanizacyi "Kamunisty Pieciarburha i Leninhradzkaj Vobłaści" horača padtrymali zaklik CK sarvać "tryjumfalnaje" šeście pa krainie pačvarnaj kinakarciny "Indyjana Džonz-4", u jakoj hieroj Harysana Forda zabivaje savieckich raźviedčykaŭ z dapamohaj kryštalnych čarapoŭ.”
“Kamunisty horada Lenina rašuča zajaŭlajuć ab svaim hłybokim abureńni vychadam u rasijski prakat filma-pravakacyi, adryžki chałodnaj vajny, hniusnaha paskvila, – havorycca ŭ zajavie Centralnaha kamitetu. – U karykaturnym i niepryvabnym vyhladzie film maluje dziejańni savieckich sałdat i našaj raźviedčycy, jakich cynična i biaźlitasna źniščaje amerykanski superhieroj-adzinočka Indyjana Džonz. Padobnyja vydumki sfarmujuć u novaha pakaleńnia rasiejcaŭ upadnickija nastroi, niaŭpeŭnienaść u mahutnaści svajoj krainy, idałapakłonstva pierad ZŠA.”
“Na toj peryjad pryjšłasia maja maładość, – dzielicca ŭspaminami člen CK Viktar Muchin pra 1957 hod. – A u filmie chvacki kaŭboj Indyjana Džonz skača ŭ saviecki "ŭazik" , bje žančynu – savieckuju raźviedčycu ŭ vykanańni Kiejt Błanšet – nahoj u žyvot, jak byccam tak i treba. Indziejcy i inšaplanecianie zaadno z Džonzam i jaho sumnieŭnymi pryjacielami ratujuć śviet ad ruskaj pahrozy – jakaja brydota, prosta paranaidalny son Čerčyla.”
“Chto słužyŭ, jak ja, u Savieckim vojsku, toj viedaje, što pas tak nia nosiać, – aburajecca niedakładnaściami deputat horadu horada Słancy Viktar Piaroŭ. – Kamandy vykonvajucca imhnienna, a žančyny ŭ nas na fašystak nie padobnyja. Ale, mabyć, Kiejt Błanšet pahražaje biespracoŭje, i voś jana , jak na panel, pajšła zdymacca ŭ hety film.”
“Chaču hetamu Fordu ŭ vočy pahladzieć, – dałučajecca da kamentaroŭ sakratar Tośnienskaha RK KP Andrej Hindas, – pamiataju, jak jon pryjaždžaŭ u našu krainu, jeŭ ruskija chleb-sol, havaryŭ, jakija pryhožyja vašy žančyny. A u kino jon našu žančynu, nie mirhnuŭšy, źniščaje. Navat inšaplanecianin jamu bližejšy za ruskaha. Nu što ž...iość Ameryka Džona Ryda, Andžeły Devis, Leanarda Pełcijera i Samanty Śmit, a jość Ameryka Harysana Forda i Kiejt Błanšet – druharazradnych aktoraŭ, jakija słužać na pabiahuškach u CRU.”
“Ja uspaminaju hierainiaŭ savieckaha kino – advažnych padpolščyc, raźviedčyc, udarnic pracy, ich śvietłyja čystyja tvary na fonie drapiežnaha abličča zahannaj Błanšet, i ŭ mianie niama słovaŭ,” –skardzicca kamunistka Veranika Klinavickaja. Veranika taksama člen CK. Na partyjnaj fatahrafii jana ŭ šeraj formie – jak i hierainia Kiejt Błanšet.
Kamunisty Leninhradzkaj vobłaści aburajucca pakupkaj “antysavieckaj” karciny i zyčać, kab “vorahi Rasii hladzieli nizkaprobny paskvil Śpiłberha na dvd, padpolna, jak vyčvarency.” Kamunisty zaklikajuć hledačoŭ aśvistać film padčas premjery i adpravić listy pratestu “maryjanetkam imperyjalizmu – Harysanu Fordu i Kiejt Błanšet”.
Ichnija biełaruskija adnapartyjcy na hety kont pakul nie vykazvajucca.
