Baćka centravoha «Akłachomy-Sici Tander» Enesa Kantera, Miechmiet Kanter raspaŭsiudziŭ adkryty list, u jakim havorycca, što jon i jaho siamja adrakajucca syna. Pryčynaj stali palityčnyja pierakanańni baskietbalista.
Enes Kanter — adzin z samych viadomych prychilnikaŭ prapaviednika Fietchułacha Hiulena.
Baćka skazaŭ, što Enes byŭ zahipnatyzavany prychilnikami Hiulena.
U siaredzinie lipienia ŭ Turcyi adbyłasia sproba vajskovaha pieravarotu, u jakim abvinavacili prychilnikaŭ Hiulena.
Miechmiet Kanter padkreślivaje, što bolš za 30 hadoŭ vykładaŭ u studentaŭ. «Kali b ja viedaŭ, što dojdzie da takoha, to nie pavioz by syna ŭ baskietbolny łahier talentaŭ u ZŠA», — piša baćka.
«Ja papiaredžvaŭ Enesa, adnak jon nie pierastaŭ pisać tvity suprać našaha prezidenta i naroda Turcyi. Naša siamja nie padtrymlivaje niepavažnyja vykazvańni. Ja i siamja Kanteraŭ adrakajemsia ad Enesa. Chočam prynieści prabačeńni našamu prezidentu i narodu Turcyi, za toje, što vychavali takoha syna», — havorycca ŭ liście.
Niekatoryja ličać, što Miechmiet Kanter moh napisać hety list pad prymusam.
Enesu Kanteru 24 hady. Ad 2011 hoda jon hulaje ŭ najmacniejšaj baskietbolnaj lizie śvietu – NBA. Spačatku turak vystupaŭ za «Jutu Džaz», a apošni siezon pravioŭ u «Akłachomie Tander». Razam z novaziełandcam Styvienam Adamsam Kanter utvarajuć paru samych paznavalnych vusoŭ u NBA. Niekatoryja ličać Kantera samym mocnym u lizie «šostym» hulcom, heta značyć tym, chto vychodzić nie ŭ startavaj piaciorcy, a na zamienu.
Za siezon 2016/2017 Enes Kanter atrymaje bolš za 17 miljonaŭ dalaraŭ.
