VI Mižnarodny forum teatralnaha mastactva «Teart» projdzie ŭ Minsku z 28 vieraśnia pa 29 kastryčnika. Čakajuć nas 22 pastanoŭki z 9 krain: Biełarusi, Vienhryi, Hiermanii, Litvy, Polščy, Rasii, Słavienii, Francyi i abyjakavaj Šviejcaryi. Prahrama budzie składacca z troch častak: mižnarodnaj, šoukiejsa Belarus Open i prahramy dadatkovych mierapryjemstvaŭ.
U šoukiejsie, to bok teatralnaj «vitrynie» biełaruskaha teatralnaha pracesu, budzie vystaŭlena najlepšaje. Byli b achvotniki na našy talenty. Paśla letašniaha šoukiejsa ni pra jaki praryŭ našych u Avińjon abo Edynburh ja tak i nie pačuŭ, jak ni prystaŭlaŭ stary radyjoprymač da vucha.
U vitrynie ŭsie daŭno znajomyja. Dźmitryj Bahasłaŭski sa śpiektaklem «Saša, vyniesi śmiećcie». Ihar Kazakoŭ ź lalečnaj fiejeryjaj «Na dnie» pavodle Horkaha, siamiejnaja drama «Opium» Alaksandra Marčanki, «Ptuški» łaŭreata premii «Załataja maska» Alaksieja Lalaŭskaha. Režysior Mahiloŭskaha abłasnoha dramatyčnaha teatra Uładzimir Piatrovič pryviazie ŭ stalicu svaju viersiju knihi Śviatłany Aleksijevič «Čas sekand-chend». Śpiektakl atrymaŭ adrazu niekalki ŭznaharod za akciorskuju ihru na praviedzienym fiestyvali nacyjanalnaj dramaturhii ŭ Babrujsku. Ciapier ihru zmohuć acanić i ŭ Minsku. Nie zabyvajuć i pra Adama Mickieviča. Ubačym novuju biełaruska-polskuju pastanoŭku «Dziadoŭ» z Bresckaha akademičnaha teatra dramy.
Taksama ŭ našym biełaruskim čamadančyku teatralna-muzyčny prajekt «Z žyćcia kazurak» i «Krejcarava sanata» Saŭlusa Varnsa Mahiloŭskaha abłasnoha dramatyčnaha teatra. Aleh Žuhžda, jaki vystraliŭ pad zasłonu siezonu «Čajkaj», pakaža «Vizit staroj damy» pa Dziurenmatu ŭ vykanańni hrodziencaŭ. Brescki teatr lalek viazie «Fro» pa Płatonavu.
U heta składana pavieryć, ale na hety raz u mižnarodnaj prahramie «TeArta» byccam by niama śpiektaklaŭ Ałvisa Chiermanisa, lubimca minskaj publiki. Tym samym my atrymlivajem novuju pažyvu dla razmoŭ: śpiektakli maestra Minsku nie pa kišeni? Abo ŭ Novaha Ryžskaha teatra nasyčanaje hastrolnaje žyćcio?.. Što ž, u hetym hodzie Ałvis Chiermanis budzie z nami tolki ŭ dumkach.
Zatoje ŭ afišy mižnarodnaj prahramy krasujecca inšy prybałt — Oskar Karšunovas. Jon pradstavić śpiektakl pa Bekietu «Apošniaja stužka Krepa». Hetuju absurdysckuju pjesu pra staroha, vykinutaha na ŭzbočynu žyćcia, jak praviła, vybirajuć dla svajho bieniefisu bahatyja i znakamityja. U Maskvie Krepa z pośpiecham hraŭ mastacki kiraŭnik teatra Et Cetera Alaksandr Kalahin. U śpiektakli Karšunovasa hałoŭnuju rolu vykanaje Juozas Budrajcis, jaki skałychnuŭ našy čerstvyja sercy pracaj u filmie Alaksandry Butar «Biełyja rosy. Viartańnie».
Jašče z zorak suśvietnaha teatra ŭ Minsku buduć pradstaŭleny — barabanny drob! — Krystof Martaler (śpiektakl «Kinh sajz»), Dekłan Doniełan ( «Miera za mieru» Maskoŭskaha teatra im. Puškina), vuhorac Karnel Mudruca ( «Demiencyja»). Juryj Butusaŭ, jaki niekali ŭdzielničaŭ u fiestyvali sa śpiektaklem «Dobry čałaviek ź Siezuana», pryviazie pastanoŭku «Horad. Žanićba. Hohal».
Režam apošni ahurok i nie zabyvajem staruju iścinu: apošnija stanuć pieršymi. Kvitki na samyja hučnyja pastanoŭki «TeArt» lepš nabyvać prosta siońnia.
