Centrvybarkam apublikavaŭ śpisy kandydataŭ u pałatu pradstaŭnikoŭ. U Minsku ad vybaraŭ adčapili niekalki nadzvyčaj mocnych pretendantaŭ (naprykład, Alesia Łahvinca), jakija pry sumlennym padliku hałasoŭ musili patrapić u parłamient.
Siarod tych, kaho čaściakom nazyvajuć «umieranaj apazicyjaj», pa minskich akruhach buduć bałatavacca Taćciana Karatkievič i Aleh Trusaŭ.
Eks-kandydatka ŭ prezidenty Taćciana Karatkievič zajaviłasia pa Kastryčnickaj akruzie №97.
Jaje hałoŭny kankurent — načalnik stancyi «Minsk-Pasažyrski» Alaksandr Drožža, jakoha ŭžo «rekłamuje» haradskaja aficyjnaja presa.
Inšyja kandydaty — vyłučency ad palityčnych partyj, u akruzie jany nie źbirali podpisy.
Za staršyniu tavarystva Biełaruskaj movy Aleha Trusava zmohuć prahałasavać vybarcy Čkałaŭskaj akruhi №96.
Kandydatam ad «viertykali» tut vyhladaje dziejnaja deputatka Natalla Klimovič. Jana sabrała podpisy vybarcaŭ, aproč taho atrymała vyłučeńnie ad Kamunistyčnaj partyi.
Aproč ich, pa akruzie bałatujucca čaćviora partyjcaŭ. Siarod ich Siarhiej Skrabiec ad Abjadnanaj hramadzianskaj partyi, jaki pracuje, dahladajučy za niamohłym čałaviekam. A taksama małaviadomy vyłučeniec ad Partyi BNF i vyłučeniec ad «Zielanbuda».
