Blizki da ŭkrainskich śpiecsłužbaŭ prajekt «Miratvorac» učora apublikavaŭ ankiety ludziej, jakija chacieli stać bajevikami h.zv. DNR.
Dla hetaha treba było zapoŭnić farmular na sajcie sieparatystaŭ, jaki składaŭsia z hrafaŭ «kraina, horad, inicyjały, kantakty, čym mahu dapamahčy». Ahułam tam bolš za 4000 proźviščaŭ.
U źlitaj «Miratvorcam» bazie prykładna dva dziasiatki biełarusaŭ, ź niekatorymi ź ich źviazałasia «Naša Niva».
Prapanujem vašaj uvazie vytrymki z ankietaŭ našych suajčyńnikaŭ i ichnija tłumačeńni taho, jak pryvatnyja źviestki akazalisia ŭ rukach viarboŭščykaŭ «Navarosii».
Pieršym ź biełarusaŭ u śpisie idzie Siarhiej Šyroki z Babrujska. U hrafie «čym mahu dapamahčy» jon piša: «Stať v stroj i poka živoj močiť ukropov!».
Pa ŭkazanym u ankiecie numary słuchaŭku padniaŭ toj ža ž samy čałaviek, što jaje zapaŭniaŭ. Siarhiej nie staŭ admaŭlać taho, što źbiraŭsia jechać na Danbas.
Siarhiej Šyroki. Fota z «Adnakłaśnikaŭ».
«Ja nie dajechaŭ, — skazaŭ nam Siarhiej, — Ale matyvy byli. Pieršy ź ich — kaliści moj dzied vajavaŭ z fašystami, a ciapier jany znoŭ tam chodziać…».
Pra «fašystaŭ» mužčyna daviedaŭsia z rasijskich kanałaŭ, tak jon skazaŭ. A pajezdka nie ŭdałasia z pryčyny «niedachopu srodkaŭ».
Svajoj prafiesijaj Siarhiej nazvaŭ «naviadzieńnie paradku ŭ Biełarusi», pry hetym nie ŭdakładniŭšy, majecca na ŭvazie — milicyja ci dvorniki.
Zrešty, milicyjanty ŭ śpisie jość i biez hetaha, naprykład, mazyrski major Viktar Kazak.
«Staršynia raźviedroty PDV SSSR, major milicyi Biełarusi», — napisaŭ Viktar pra siabie ŭ ankiecie.
Fota z «Adnakłaśnikaŭ»
Jak stała viadoma «Našaj Nivie», taki supracoŭnik sapraŭdy słužyŭ u Mazyrskim RAUS, ale nie pracuje tam užo piać hadoŭ.
Što pryviało majora na sajt bajevikoŭ?
«Heta žart, — skazaŭ jon. — Jechać ja nie źbiraŭsia, vy što, śmiejaciesia? Heta ž turma. Heta ŭ pjanaj kampanii pažartavali prosta».
U takim ža ž duchu byŭ adkaz i niekaha Vasila Šumiłkina ź Viciebska, jaki abaznačyŭ svaju matyvacyju ŭ ankiecie prosta «chaču ŭstupić u šerahi apałčencaŭ».
«Nie, nie, nie, moža pa pamyłcy nabraŭ niejak, ja nie viedaju. Ja nikudy nie źbirajusia, ja ŭ Viciebsku», — skazaŭ Vasil.
Fota z «Adnakłaśnikaŭ».
Svajo staŭleńnie da idej h.zv. «Navarosii» jon nie zachacieŭ abmiarkoŭvać pa telefonie.
Jašče adzin patencyjny teraryst padpisaŭsia jak A.M.Sidarevič z Marjinaj Horki.
«Staršy-strałok-navodčyk, sieržant. Uzrost 45. Navyki vyžyvańnia ŭ paŭnočnych šyrotach, pieraadolvańnie vodnych pieraškod, turyst, budaŭnik. NIENAVIDŽU FAŠYSTAŬ!!!! U mianie svajaki z Ukrainy», — tak napisaŭ pra siabie Sidarevič.
Ale ŭ razmovie z žurnalistam «Našaj Nivy» mužčyna skazaŭ, što za hety čas pierahledzieŭ svaje pohlady i bolš nikudy nie źbirajecca.
«Byŭ čas, ja astyŭ trochi. Na pačatku vielmi baluča ŭspryniaŭ naviny z Ukrainy, ja dumaju, takomu ŭsprymańniu ahresiŭnaje telebačańnie paspryjała i internet — čaho tam tolki nie napišuć. Dy ŭ siamji byli niepaładki… A ciapier niejak usio naładziłasia i ja ŭžo inakš hladžu na situacyju», — skazaŭ A.M.Sidarevič.
Siarhiej Paŭłaŭ žyvie ŭ Minsku i Stoŭbcach, maje biznes pa hruzapieravozkach. Jon skončyŭ Staŭrapalskaje vajskova-avijacyjnaje vučylišča lotčykaŭ i šturmanaŭ. Jamu 49 hadoŭ. «Hatovy być na vašym baku», — napisana ŭ matyvacyi Paŭłava.
Fota z «Adnakłaśnikaŭ».
Mužčyna rašuča admaŭlaje, što niekudy adpraŭlaŭ svaje źviestki.
«Ničoha ja nie adpraŭlaŭ nikudy. Niachaj jana absiarecca, ukrainskaja raźviedka.
Padtrymlivaju «DNR», «ŁNR», kaniečnie! Nie, ja, musić, budu padtrymlivać kijeŭskuju chuntu, rabić mnie bolš niama čaho», — na hetym Paŭłaŭ abiacaje padać u sud, kali jaho proźvišča budzie zhadanaje, a paśla kidaje słuchaŭku.
Anton Pikun rodam ź Śvisłačy kaža, što ŭ kožnaha miedala jość dva baki. «Ja padtrymlivaju i «DNR», i Ukrainu. Mnie prosta škada ludziej. Ja nie źbiraŭsia jechać vajavać, ja što, śmiarotnik? Ja žyć chaču!»
Praź niejki čas Anton Pikun pryznajecca, što ŭsio ž adpraŭlaŭ zvarot. «Niešta takoje było 2 hady tamu. Chacieŭ pahladzieć, jak pracuje hetaja sistema. Było cikava prosta, ale mnie nichto nie adkazvaŭ».
Fota z «UKantakcie».
Paśla spadar Pikun staŭ cikavicca, ci budzie jamu ŭskładnieny vyjezd va Ukrainu i inšyja krainy i ci zacikaviacca im śpiecsłužby.
«Za hetyja dva hady ŭ mianie ŭ žyćci šmat što pamianiałasia, pamianiaŭsia moj śvietapohlad. Ja ciapier razhladaju toj kanflikt jak prosta dziciačy sadok», — kaža Anton Pikun.
«Małodšy lejtenant zapasu. Dośvied raźviedvalna-dyviersijnaj pracy ŭ Karabachu. Fizičnaja forma — zdavalniajučaja dla maich hadoŭ. Hatovy dapamahčy», — piša 56-hadovy minčuk Ihar Chatkoŭski. Jak vyśvietliłasia z razmovy, Chatkoŭski ŭ svoj čas słužyŭ u HRU.
Fota z «UKantakcie».
«Ja nikudy nie pisaŭ. Maje dadzienyja adkrytyja ŭ Adnakłaśnikach, Ukantakcie. Mnie ž užo 57 hadoŭ, dośvied niejki maju, moža, niechta z ukraincaŭ mianie pamiataje. Nie, ja nikudy nie źbirajusia. Ciapier na froncie ludzi majho vieku doŭha nie žyvuć, doŭha žyvuć tyja, chto dobra biehaje. A kudy mnie z maim žyvatom?
U mianie niama simpatyj ni da ŭkraincaŭ, ni da «DNR», ich spravy, niachaj raźbirajucca. U mianie kuča znajomych u śpiecstrukturach, tamu ja nie ździŭleny, što dadzienyja trapili.
Dva hady tamu ja pierapisvaŭsia z cełym šeraham ludziej, jakija zaniali aktyŭnuju pazicyju, jany cikavilisia, klikali mianie. Sprabavali raicca. Ale ja kažu, što raić na dystancyi biessensoŭna.
Navat tut u Minsku ŭ mianie byŭ kaleha na pracy — były amapaviec rasijski. My razam adpracavali miesiacy dva, a potym jon źnik. Praź niejki čas pisaŭ mnie ŭ internecie Vicia, što jon byŭ u Maryupali. Davaŭ mnie dadzienyja adnoj damy cikavaj, jakaja mianie klikała ŭ Maryupal. Ale ja ciapier siadžu ŭ Biełarusi, u Minsku, možacie prychodzić u hości, papić kavy».
Ciapier Ihar Chatkoŭski ŭdzielničaje ŭ pošukach źnikłych ludziej razam z dobraachvotnikami Čyrvonaha kryža. Jon aŭtar knihi «Rodam z raźviedki».
Padobna da taho, što hety śpis zusim nie fejkavy. I pryviedzienyja razmovy ź biełarusami paćviardžajuć, što vypadkovych ludziej tam faktyčna niama. Bolš za toje, adzin z uzhadanych u śpisie biełarusaŭ — Andrej Hryšucin — usio ž pajechaŭ vajavać na Danbas, dzie «słužyć» snajpieram i pieradaje videa-vitańni Łukašenku.
«Były snajpier śpiecnaza MUS RB», — tak apisvaŭ siabie Hryšucin u ankiecie na sajcie bajevikoŭ.
