Hibiel ad padzieńnia z vyšyni vyjšła na treciaje miesca siarod pryčyn dziciačaj śmiarotnaści ŭ Biełarusi, paviedamiŭ žurnalistam 23 žniŭnia namieśnik dyrektara pa arhanizacyjna-mietadyčnaj pracy RNPC traŭmatałohii i artapiedyi Leanid Łomać.
Pavodle jaho słoŭ, sioleta padzieńni ź piataha miesca padnialisia da treciaha paśla DTZ i ŭtapleńniaŭ. Łomać adznačyŭ, što śmiarotnaść ad apošnich dvuch pryčyn źniziłasia dziakujučy dobraj mižviedamasnaj prafiłaktyčnaj pracy MUS, MNS, Minadukacyi, a taksama Asvoda.
U toj ža čas statystyka padzieńniaŭ praktyčna nie źmianiłasia: letaś zahinuli 16 dziaciej, za šeść miesiacaŭ hetaha hoda — 8.
«Kazać pra heta i pravodzić niejkuju prafiłaktyku prosta nieabchodna, — ličyć śpiecyjalist. — Kali vy źviarnuli ŭvahu na apošnija žyroŭki, to na ich abarocie ŭžo i kamunalniki pišuć pra niebiaśpieku adkrytych voknaŭ».
Akramia taho, Łomać padkreśliŭ, što z vyšyni padajuć nie tolki maleńkija dzieci, ale i padletki — u asnoŭnym z dachaŭ. Jon adznačyŭ dastupnaść i adkrytaść dla ich haryščaŭ i techničnych pavierchaŭ, adkul jość vychad vonki, i źviarnuŭ uvahu na niebiaśpieku takich navamodnych ekstremalnych padletkavych zachapleńniaŭ, jak rufinh (łažańnie pa dachach) i biłdyrynh (łažańnie pa ścienach vyšynnych budynkaŭ).
U cełym dziciačaja śmiarotnaść ad traŭmaŭ u paraŭnańni z 2010 hodam źniziłasia z 20 da 8,8 vypadku na 100 tys. Łomać paviedamiŭ, što za pieršaje paŭhodździe 2016 hoda zahinuła 77 dziaciej, za taki ž pieryjad minułaha — 84 dziciaci. Adnak, na jaho dumku, heta ŭsio roŭna vialikija ličby, i leta źjaŭlajecca samym traŭmaniebiaśpiečnym dla dziaciej pieryjadam.
