Žonka zabitaha Sałamona Jasmana idzie na pieršaje sudovaje pasiadžeńnie, 16 žniŭnia. Fota: Jaŭhien Cichanovič
U Baranavičach sudziać padazravanaha ŭ zabojstvie i rasčlanieńni hramadzianina ZŠA Sałamona Jasmana.
Abvinavačany mužčyna nie pryznaje svajoj viny ŭ razbojnym napadzie na achviaru, ździeku z trupa i admaŭlaje toje, što zabity byŭ u biezdapamožnym stanie.
Pa słovach padsudnaha, u toj viečar jany z Sałamonam hladzieli vystupleńnie biełaruskaha prezidenta pa televizary.
— Sałamon niepachvalna vykazvaŭsia pra kiraŭnika dziaržavy, skazaŭ, što toj krainu na kaleni pastaviŭ, — raspavioŭ pra pačatak kanfliktu mužčyna. — Potym skazaŭ, što biełarusy ŭsio ścierpiać, a za 10 dalaraŭ miniet lubomu zrobiać. Ja nie strymaŭsia i ŭdaryŭ jaho ŭ skivicu.
Paśla hetaha, pa śviedčańniach zatrymanaha, pačałasia bojka, padčas jakoj jon zadušyŭ Jasmana. Padsudny vyrašyŭ pazbavicca trupa. Jon śćviardžaje, što z-za chvaroby nie moh padniać cieła zabitaha, tamu vyrašyŭ rasčlanić trup.
Zatrymany pryznaŭsia, što ŭmieŭ raźbirać žyvioł, bo 8 hadoŭ tamu zajmaŭsia hadoŭlaj i zabojem śviniej.
Uzbroiŭšysia kuchonnym nažom, padsudny rasčlaniŭ trup, skłaŭ častki cieła ŭ skrutki i ŭ viodry, vyviez ich na svajoj mašynie za horad i zakapaŭ. Svaju vopratku złačyniec paśla hetaha spaliŭ. Mužčyna śćviardžaje, što 2500 dalaraŭ ZŠA ŭ zabitaha nie braŭ — uziaŭ tolki fotaaparat, mabilny telefon, ałkahol, roznyja maniety, pralny parašok i vypadkova prychapiŭ vid na žycharstva zabitaha. Paźniej u vokładcy dakumienta znajšoŭ 200 dalaraŭ ZŠA.
22 sakavika abvinavačanaha vyklikali ŭ milicyju na apytańnie, jakoje pravodzili z vykarystańniem palihrafa. Prybor pakazaŭ, što mužčyna kaža niapraŭdu, paśla čaho padazravany napisaŭ jaŭku z pavinnaj.
Zabiŭ, rasčlaniŭ, abakraŭ
Na pieršym sudovym pasiadžeńni, jakoje adbyłosia 16 žniŭnia, abvinavačany paprasiŭ pieranieści słuchańni, bo jaho abaronca znachodzicca ŭ adpačynku. Sud zadavoliŭ chadajnictva. Padazravanamu pradjavili abvinavačvańnie pa niekalkich artykułach — za zabojstva čałavieka, jaki znachodzicca ŭ biezdapamožnym stanie, razboj, ździek z trupa, kradziež i źniščeńnie dakumientaŭ.
«Trapiŭšy ŭ kvateru, ja adrazu zrazumieła, što niešta nie tak. Kilimki lažali nie tak, jak ja pakłała, źnikli rečy, a ŭ kalidory zastałasia maleńkaja plamka kryvi. Ja vyklikała milicyju», — raspaviała Taćciana, žonka zabitaha.
Abvinavačany skraŭ z kvatery Jasmana darahi ałkahol, techniku, nabor haječnych klučoŭ, składny i palaŭničy nažy, kalekcyjnyja i zvyčajnyja maniety roznych krain, a taksama ŭsie najaŭnyja hrošy i bankaŭskuju kartu Sałamona. Zabojca zabraŭ navat žetony dla prajezdu ŭ ńju-jorkskim mietro. Ahulnaja suma škody — 106,5 młn niedaminavanych rubloŭ (amal 5500 dalaraŭ ZŠA).
Žonka Sałamona Jasmana Taćciana raspaviała, što paśla śmierci muža akazałasia biez srodkaŭ.
— Svajaki dapamahli, sabrali hrošy na pachavańnie. A dzicia zastałosia biez taty i biez srodkaŭ. Kab žyć, my pradajom zołata, jakoje ŭ mianie zastałosia, — raspaviała Taćciana.
Doŭhi čas žančyna nie pracavała, jaje i syna zabiaśpiečvaŭ Sałamon.
«Byŭ vinien bujnuju sumu»
Sałamon Jasman — hramadzianin ZŠA. Praciahły čas jon žyŭ u Ńju-Jorku, pracavaŭ kiroŭcam limuzina. U Baranavičach žyvuć jaho svajaki. U adzin sa svaich vizitaŭ Jasman paznajomiŭsia z Taćcianaj, jany pažanilisia. U 1999 hodzie Taćciana pierajechała da muža ŭ Ńju-Jork. Tam naradziŭsia ich syn Devid. Ciapier chłopčyku 15 hadoŭ. Pražyŭšy niekalki hadoŭ u Ńju-Jorku, Taćciana z synam viarnułasia ŭ Baranavičy. Žančyna kaža, što joj było ciažka žyć u ZŠA. Sałamon zastaŭsia ŭ Amierycy i časta prylataŭ da siamji ŭ hości. U 2010 hodzie Jasman pierajechaŭ u Baranavičy.
— My z synam žyli na «pasiołku», a muž — u centry horada. Naša kvatera nie dazvalaje žyć usim razam. Akramia taho, Sałamon byŭ kapryznym, šmat kuryŭ. My vyrašyli, što tak budzie lepš, — raspaviała Taćciana Jasman.
Sałamon, pa słovach Taćciany, lubiŭ znosiny, hulaŭ u kazino, da jaho časta prychodzili hości. Niekalki hadoŭ tamu ŭ kazino jon i paznajomiŭsia z abvinavačanym, padtrymlivaŭ ź im pryjacielskija adnosiny.
— Sałamon byŭ dobrym i spakojnym čałaviekam. U kazino šmat kamu pazyčaŭ hrošy. Abvinavačany vinien byŭ majmu mužu bujnuju sumu, — raspaviała Taćciana.
Žančyna miarkuje, što, kali b nie doŭh abvinavačanaha, jaje muž zastaŭsia b žyvy.
