«I chto kazaŭ, što našyja pravachoŭniki nie lubiać biełaruskuju movu? Pryjšoŭ ja siońnia ŭ DAI pa štraf, — raskazvaje ŭ siabie ŭ fejsbuku mahiloviec Alaksandr Ahiejeŭ. — Vializnaja čarha. Usim dajuć štraf. Zajšoŭ. Tam usie papiery na adnu bazavuju ŭžo padrychtavanyja. Ja, ščyra kažučy, maralna taksama hatovy. Ale jak tolki milicyjanty zrazumieli, što ŭ pratakole maje tłumačeńni napisany nie pa-ŭkrainsku, a pa-biełarusku, to adrazu zaŭśmichalisia, stali tłumačyć mnie, čamu jany vymušanyja vypisać mnie štraf.
Ja stajaŭ na svaim: «Zrazumiejcie mianie, kali łaska. Kali b pratakoł byŭ składzieny pa-biełarusku, to ja b z zadavalnieńniem zapłaciŭ maksimalny štraf. Ja b u historyju ŭvajšoŭ, jak pieršy čałaviek, jakomu ŭ Mahilevie pratakoł i štraf vypisali na biełaruskaj movie! A tak možna abmiežavacca papiaredžańniem. Bo ja zakonapasłuchmiany hramadzianin, pieršy raz pamyliŭsia, dy i avaryjnaj situacyi nie stvaryŭ». Paśla paŭzy jašče dadaŭ: «Da taho ž mnie cikava, čym heta skončycca. Bo vy ž hieroi majho apaviadańnia! Pačatak ja napisaŭ, jak pratakoł skłali, a finiš dapišu siońnia ŭ zaležnaści ad rašeńnia. Voś Vy, kapitan, u mianie budziecie złym palicejskim, a vy, staršy lejtenant (toj chto vioŭ maju spravu i ŭśmichaŭsia), vidać, budziecie dobrym!»
Dla vyhladu jany paspračalisia, što raz budzieš dobrym i papiaredziš, druhi, a potym moža być surjoznaja avaryja… A zatym «dobry palicejski» pajšoŭ pa načalstvie. Schadziŭ u adzin kabiniet biezvynikova i pajšoŭ vyšej. Ci to starlej nie chacieŭ stać kiepskim hierojem apaviadańnia, ci to biełaruskaj movy jon tajemny amatar, ale viarnuŭsia z uśmieškaj i kaža: «Padpisvajcie». Ja adkazvaju, što jašče ničoha nie zrazumieŭ, padpišu, a potym vyśvietlicca, što ja kvateru vam padaryŭ.
Jon śmiajecca i znoŭ: «Padpisvajcie. Pałkoŭnik skazaŭ, što ŭžo za adnu movu možna abmiežavacca papiaredžańniem».
Karaciej, vypisali mnie aficyjnaje papiaredžańnie, a nie štraf i mienavita dziakujučy biełaruskaj movie. Vivat movie! Małajcy i razumnyja milicyjanty. Adno ja prajhraŭ, bo tak i nie dabiŭsia. kab pratakoł ab administracyjnym parušeńni na mianie skłali na biełaruskaj movie», — piša Ahiejeŭ.
