Mocnyja paŭtornyja šturški razburyli hałoŭnuju darohu ŭ italjanski horad Amatryče, jaki surjozna paciarpieŭ ad ziemlatrusu za niekalki dzion da hetaha.
AFP
Daroha była asnoŭnaj transpartnaj arteryjaj, jakoj karystalisia ratavalniki i miedyki dla akazańnia dapamohi paciarpiełym ad stychii. Ranicaj u piatnicu byŭ zarehistravany čarhovy padziemny šturšok mahnitudaj 4,7. U vyniku darožnaje pałatno było surjozna paškodžanaje.
U paciarpiełych rajonach abvieščanaje nadzvyčajnaje stanovišča.
Pavodle apošnich źviestak, kolkaść zahinułych u vyniku stychijnaha biedstva dasiahnuła 268. U balnicach zastajucca 387 paciarpiełych u vyniku padziemnych šturškoŭ.
Bryhady ratavalnikaŭ druhija sutki praciahvajuć abśledavańnie ruin budynkaŭ u razburanych haradach. Ich praca ŭskładniajecca pieryjadyčnymi padziemnymi šturškami, lik jakich idzie na sotni.
Spadziavańniaŭ na toje, što pad zavałami moža jašče zastavacca niechta žyvy, stanovicca ŭsio mienš.
U toj ža čas ratavalniki adznačajuć, što paśla ziemlatrusu 2009 hoda ŭ Italii adnaho z vyžyłych znajšli pad zavałami praz 72 hadziny.
Premjer-ministr Matea Rency zapeŭniŭ, što na adnaŭlenčyja raboty budzie vydzielena 50 młn jeŭra. Rency taksama abviaściŭ ab skasavańni padatkaŭ dla miascovych žycharoŭ i apublikavaŭ inicyjatyvu «Italjanskija damy».
Italjanskija ŚMI niadaŭna raskrytykavali standarty, pavodle jakich uzvodzilisia damy ŭ siejsmaniebiaśpiečnaj zonie. Niekatoryja z razburanych budynkaŭ byli tolki niadaŭna kapitalna adramantavanyja.
Razam z tym italjanski premjer papiaredziŭ, što było b absurdam mierkavać, što Italija moža budavać absalutna siejsmatryvałyja damy.
Situacyja ŭskładniajecca tym, što paškodžanyja budynki, jakija vystajali ŭ vyniku ziemlatrusu, praciahvajuć razburacca.
