30 žniŭnia prykładna ŭ 19.30, bolš za 100 čačencaŭ, jakija znachodzilisia kala biełaruskaha pahraničnaha pierachodu «Brest» na biełaruska-polskaj miažy i jakich polskija pahraničniki nie prymajuć u jakaści biežancaŭ, razyšlisia. Pra heta paviedamiŭ BiełaPAN pravaabaronca Raman Kiślak.
«Siońnia jany nakiravali zvarot da pradstaŭnikoŭ čačenskaj dyjaspary ŭ Polščy, spadziejučysia, što paśla hetaha ich prablema pačnie vyrašacca», — skazaŭ pravaabaronca.
Jak raniej paviedamlaŭ BiełaPAN, dniom 29 žniŭnia kala pahraničnaha pierachodu sabrałasia kala 200 čačencaŭ, jakija biespaśpiachova sprabavali pierasiekčy miažu praz hety aŭtadarožny punkt propusku na aŭtobusie, a taksama ciahnikom Brest — Ciarespal.
Takim čynam biežancy z Čačni chacieli pryciahnuć uvahu polskaha boku da svajoj prablemy. Pavodle słoŭ niekatorych, jany žyvuć u Breście niekalki miesiacaŭ i kožny dzień robiać sproby vyjechać u Polšču, kab atrymać tam status biežanca. Čačency kažuć, što pakidajuć radzimu, bo žyć tam niemahčyma. Bolš za 100 ź ich načavali kala pahranpierachodu.
Pavodle źviestak Kiślaka, nichto z čačencaŭ zatrymany nie byŭ.
