Studenty piedahahičnych śpiecyjalnaściaŭ ź pieršaha kursa pavinny zajmacca hramadskaj pracaj i vałanciorstvam. Takoje mierkavańnie vykazaŭ rektar Biełaruskaha dziaržaŭnaha piedahahičnaha univiersiteta (BDPU) imia M.Tanka Alaksandr Žuk paśla pryvitalnaha słova da studentaŭ VNU z nahody Dnia viedaŭ.
«Naš łozunh u hetym hodzie — «Bieražy kožnuju chvilinu». Žyćcio chutkabiežnaje, tamu treba być mabilnym i dynamičnym. Pracesu navučańnia heta tyčycca tak: studenty ź pieršaha kursa pavinny aktyŭna zajmacca hramadskimi i vałanciorskimi spravami, kab stać sučasnymi piedahohami — nie tolki prafiesijanałami, ale i tvorčymi, i kreatyŭnymi; udaskanalvacca i abnaŭlać padychody ŭ dziejnaści», — skazaŭ Alaksandr Žuk i dadaŭ, što patok infarmacyi siońnia vielizarny, heta «šmatviedańnie» z dapamohaj technałohij chavaje za saboj niedachop fundamientalnaści viedaŭ.
Rektar taksama adznačyŭ, što na prykładzie ŭniviersiteta chacieŭ by pakazać nieabchodnaść praktyki ź pieršaha kursa. U jakaści ekśpierymientu ŭ BDPU ŭviali tak zvanuju vałanciorskuju piedpraktyku dla studentaŭ 1-ha kursa, padčas jakoj studenty mohuć nazirać i ŭklučacca ŭ navučalny praces ustanoŭ adukacyi.
«Vałanciorstva dapamoža zrazumieć studentam, ci žadajuć jany pracavać piedahoham, užo ź pieršaha kursa», — skazaŭ Alaksandr Žuk. Na druhim kursie uviedzieny «Dzień u škole». Jaho sutnaść zaklučajecca ŭ tym, što studenty-druhakurśniki ŭsich fakultetaŭ adzin dzień u tydzień pavinny pravodzić va ŭstanovie adukacyi: budučyja vychavalniki — u dziciačym sadzie, nastaŭniki — u škole, sacyjalnyja piedahohi — u adpaviednych ustanovach sacyjalnaj śfiery.
Što tyčycca ciapierašniaj ustupnaj kampanii, rektar adznačyŭ, što ŭ cełym pa mnohich śpiecyjalnaściach dzionnaj i zavočnaj formaŭ navučańnia prachadnyja bały ŭ VNU značna vyraśli ŭ paraŭnańni z 2015 hodam.
