Upraŭleńnie pa kantroli za praduktami charčavańnia i lekavymi srodkami ZŠA (FDA) zabaraniła prodaž antybakteryjnaha myła i hielaŭ dla cieła, patłumačyŭšy heta tym, što kampanienty, jakija źmiaščajucca ŭ ich, niebiaśpiečnyja pry rehularnym praciahłym užyvańni, a akramia taho — nieefiektyŭnyja. Pra heta havorycca ŭ paviedamleńni CNN.
Havorka idzie pra 19 rečyvaŭ, siarod jakich jość i najbolš papularnyja kampanienty antybakteryjnych srodkaŭ — trykłazan i trykłakarban. Pakul zabaroniena realizacyja tolki myła i hielaŭ dla duša, a pra rastvory dla dezinfiekcyi ruk i antybakteryjnyja survetki havorka nie idzie.
Džaniet Vudkok (Janet Woodcock), kiraŭnik Dziaržaŭnaha ekśpiertnaha centra (Center for Drug Evaluation and Research), tłumačyć, što mnohija pakupniki ličać, što antybakteryjnaje myła značna bolš efiektyŭna spraŭlajecca z raspaŭsiudžvańniem bakteryj, čym zvyčajnaje myła i vada, adnak navukovych paćviardžeńniaŭ hetaha faktu atrymana nie było. U realnaści ž niekatoryja antybakteryjnyja kampanienty mohuć navat naškodzić arhanizmu.
Vytvorcam dajecca hod na toje, kab źmianić recepturu, vyklučyŭšy zabaronienyja inhredyjenty, albo zusim spynić vypusk myła i hielaŭ dla duša.
U svaju čarhu Amierykanski instytut čyścini (American Cleaning Institute), stvorany ŭ 1926 hodzie amierykanskaj Asacyjacyjaj vytvorcaŭ myła i hliceryny (Association of American Soap and Glycerine Producers), paviedamiŭ, što ŭ FDA jość usie nieabchodnyja navukovyja dokazy. Vytvorcy płanujuć pravieści dadatkovyja daśledavańni, jakija paćvierdziać efiektyŭnaść i biaśpieku antybakteryjnych srodkaŭ.
U navukovych ž publikacyjach havorycca, što rehularnaje vykarystańnie myła, jakoje źmiaščaje trykłazan, moža pryvieści da raspaŭsiudžvańnia bakteryj, jakija vałodajuć lekavaj ustojlivaściu. Paćviardžeńniaŭ taho, što antybakteryjnaje myła bolš karysna dla zdaroŭja, čym zvyčajnaje, vyjaŭlena nie było.
