U žniŭni terminovyja valutnyja ŭkłady nasielnictva skaracilisia, niahledziačy na naličanyja pracenty, na 39,5 młn dołaraŭ. U toj ža čas rublovyja ŭkłady nasielnictva z ulikam naličanych pracentaŭ pavialičylisia na 65,3 młn denaminavanych rubloŭ.
Pa stanie na 1 vieraśnia terminovyja rublovyja ŭkłady nasielnictva skłali 2,66 młrd denaminavanych rubloŭ i pavialičylisia ŭ paraŭnańni z pačatkam hoda z ulikam naličanych pracentaŭ na 1,8%.
U toj ža čas terminovyja valutnyja ŭkłady nasielnictva, pavodle danych Nacbanka, na 1 vieraśnia składali 7 młrd 197 młn dołaraŭ i skaracilisia ŭ paraŭnańni z pačatkam hoda amal na 494,5 młn dołaraŭ.
Analityki finansavaha rynku tłumačać skaračeńnie valutnych układaŭ fizičnych asob u bankaŭskaj sistemie tym, što nasielnictva imkniecca za košt nazapašanych raniej źbieražeńniaŭ padtrymlivać bolš vysoki ŭzrovień žyćcia va ŭmovach panižeńnia dachodaŭ. Nahadajem, realnyja dachody nasielnictva ŭ pieršym paŭhodździ skaracilisia na 7%.
«Srodki ad prodažu valuty nasielnictva tracić na biahučaje spažyvańnie. Dachody ŭ nasielnictva ŭpali, ale žyćcio nie spyniłasia, i nasielnictva sprabuje padtrymlivać ład žyćcia za košt nazapašanych raniej źbieražeńniaŭ», — adznačyŭ u razmovie z karespandentam BiełaPAN staršy analityk foreks-brokiera Forex Club Valeryj Pałchoŭski.
Z hetaj vysnovaj zhodnyja i śpiecyjalisty Nacyjanalnaha banka. «Pry istotnym źnižeńni dachodaŭ nasielnictva zachoŭvaje svaju zvyčku da spažyvańnia», — adznačaŭ letam hetaha hoda padčas adnoj z kanfierencyj načalnik hałoŭnaha ŭpraŭleńnia manietarnaj palityki i ekanamičnaha analizu Nacbanka Dźmitryj Muryn.
Pavodle infarmacyi BiełaPAN, nasielnictva zachoŭvaje asnoŭny abjom svaich źbieražeńniaŭ u siami najbujniejšych bankach (tam znachodzicca 90% usich bankaŭskich układaŭ nasielnictva).
Tak, na 1 žniŭnia abjom układaŭ nasielnictva ŭ «Biełarusbanku» składaŭ 8,5 młrd rubloŭ, u «Biełahraprambanku» — 3,3 młrd, u «BPS-Aščadbanku» — 1,6 młrd, u «Bielinviestbanku» — 1,3 młrd, u «Pryjorbanku» — amal 1 młrd, u «Biełahraprambanku» i ŭ «Banku BiełVEB» — 0,87 młrd i 0,83 młrd rubloŭ adpaviedna.
