T.zv. «Łuhanskaja i Danieckaja narodnyja respubliki» damovilisia z Kijevam ab praviadzieńni abmienu pałonnymi pa formule «618 na 47». Pra heta zajaviła pradstaŭnik ŁNR ŭ humanitarnaj padhrupie kantaktnaj hrupy Volha Kobcava.
«U ramkach realizacyi punktaŭ piać i šeść Kompleksu mier pa vykanańni minskich pahadnieńniaŭ była dasiahnutaja damoŭlenaść ab praviadzieńni abmienu pamiž ŁNR, DNR i Ukrainaj. Ukrainie pieradajom 47 asob, a naŭzamien atrymlivajem 618 asob. Hetaja damoŭlenaść była zafiksavanaja i na pasiadžeńni Kantaktnaj hrupy 21 vieraśnia», — pieradaje słovy Kobcavaj lug-info.com.
Pavodle jaje słoŭ, ź lutaha 2015 hoda pamiž bakami kanfliktu na Danbasie było zroblena 15 abmienaŭ pałonnymi. U vyniku «DNR» i «ŁNR» vyzvalili 207 čałaviek, a Ukraina — 121 čałavieka.
U «DNR» zajavili, što ŭkrainski bok paprasiŭ nakiravać piśmovuju prapanovu ab novym abmienie pałonnymi pa formule «usich na ŭsich», piša DAN.
«U paetapnym vykanańni punkta 6 Kompleksu mier, jaki tyčycca abmienu pałonnymi «ŭsich na ŭsich», ukrainskamu boku była zroblenaja prapanova: pamianiać usich ustanoŭlenych z abodvuch bakoŭ asob. Takim čynam, vychodzić formuła «618 na 47». Ukrainski bok paprasiŭ piśmova aformić hetuju prapanovu. My ŭžo heta zrabili», — skazała pradstaŭnik «DNR» Darja Marozava.
Aficyjny Kijeŭ pakul nie kamientavaŭ hetuju infarmacyju.
