Niekalki dziasiatkaŭ IT-kampanij, jakija ŭvachodziać u navukova-technałahičnuju asacyjacyju «Infapark», mohuć stracić padatkovyja lhoty. Pra heta havorycca ŭ «Tłumačalnaj zapiscy da prajektu respublikanskaha biudžetu i raźlikovych pakazčykach pa biudžetach abłaściej i h. Minska na 2017 hod», jakaja apublikavanaja na sajcie Ministerstva finansaŭ Respubliki Biełaruś.
Fota: Reuters / Thomas Peter
U śpisie mier u halinie padatkovaj palityki značycca admiena panižanaj staŭki padatku na prybytak dla členaŭ navukova-technałahičnaj asacyjacyi «Infapark». Prajekt praduhledžvaje ŭviadzieńnie jaje na ŭzroŭni 18 pracentaŭ.
Zaraz siabry asacyjacyi vyzvalenyja ad bolšaści zboraŭ, akramia padatku na prybytak (5 pracentaŭ ad vyručki), a taksama akramia adličeńniaŭ u Fond sacyjalnaj abarony nasielnictva Ministerstva sacyjalnaj abarony.
Navukova-technałahičnaja asacyjacyja «Infapark» była stvorana ŭ 2001 hodzie. Jana abjadnoŭvaje jurydyčnyja asoby, asnoŭnym vidam dziejnaści jakich źjaŭlajecca raspracoŭka infarmacyjnych technałohij, uklučajučy prahramnyja srodki. Zaraz u asacyjacyju ŭvachodzić bolš za 50 kampanij.
Niekatoryja rezidenty «Infaparka» taksama ŭstupili ŭ Park vysokich technałohij i karystajucca padatkovymi lhotami, jakija jon daje. U dvuch parkach raźmiaščajucca, da prykładu, ITransition, EPAM Systems i IBA IT Park.
Ale źmieny ŭ zakanadaŭstvie mohuć zakranuć niekalki dziasiatkaŭ kampanij, jakija ŭvachodziać u «Infapark» i nie źjaŭlajucca rezidentami PVT. Siarod ich — Instytut matematyki NAN Biełarusi, AIPI NAN Biełarusi, «Centr Sistem Identyfikacyi», «Centr bankaŭskich technałohij» i inšyja.
