Ministerstva ŭnutranych spraŭ Hruzii zajaviła, što były prezident krainy Michaił Saakašvili budzie adrazu ž aryštavany, kali pasprabuje viarnucca ŭ krainu.
Kiraŭnik MUS Hieorhij Mhiebryšvili nahadaŭ hruzinskim žurnalistam, što Saakašvili znachodzicca ŭ vyšuku adrazu pa niekalkich kryminalnych spravach. U suviazi z hetym palicyja zatrymaje jaho adrazu paśla prybyćcia ŭ Hruziju, skazaŭ jon.
Saakašvili, jaki pracuje ciapier hubiernataram Adeskaj vobłaści Ukrainy, niadaŭna zajaviŭ, što vierniecca ŭ Hruziju adrazu paśla abviaščeńnia vynikaŭ ekzit-połaŭ paśla parłamienckich vybaraŭ, pryznačanych na 8 kastryčnika.
U vybarach udzielničaje partyja Saakašvili «Adziny nacyjanalny ruch». Taksama ŭ mažarytarnyja deputaty bałatujecca jaho žonka Sandra Rułoŭs.
Saakašvili pakinuŭ Hruziju paśla taho, jak na pasadu ŭ 2013 hodzie ŭstupiŭ novy prezident Hieorhija Marhviełašvili. Pry novych uładach ŭ dačynieńni da Saakašvili było zaviedziena niekalki kryminalnych spraŭ.
Byłoha prezidenta padazrajuć u rastracie dziaržaŭnych srodkaŭ, pieravyšeńni paŭnamoctvaŭ u suviazi z razhonam pratestnaj akcyi ŭ 2007 hodzie i ŭ datyčnaści da źbićcia apazicyjaniera.
Saakašvili zavočna aryštavany i abvieščany ŭ dziaržaŭny vyšuk, adnak damahčysia jaho abviaščeńnia ŭ mižnarodny vyšuk pravaachoŭnyja orhany Hruzii nie zmahli. Sam Saakašvili svajo kryminalny pieraśled nazyvaje palityčna matyvavanym.
