Siońnia Alaksandr Łukašenka sustrakaŭsia z kiraŭnikom vajenna-pramysłovaha kompleksu Siarhiejem Hurulovym.
Z hetaj sustrečy BiełTA pryvodzić tolki ścisłaje paviedamleńnie pra cikavaść Łukašenki da stanu rečaŭ u VPK, finansavych pytańniaŭ i pierśpiektyŭ raźvićcia.
Kankretyki niama nijakaj, što dziŭna pry ŭsiedziaržaŭnym honary za pośpiechi viedamstva — «Pałanezy», naprykład, ci novuju sistemu spadarožnikavaj suviazi i viaščańnia na kitajskim nośbicie.
Taksama, jak nam stała viadoma, litaralna siońnia Huruloŭ vylataje ŭ składzie prezidenckaj delehacyi ŭ Kitaj — razmova pamiž im i Łukašenkam adbudziecca i biez aficyjnaha pryjomu.
Ale što jany abmiarkoŭvali aficyjna?
Łukašenka i Huruloŭ, ilustracyjnaje fota
«Naša Niva» spytałasia dumki ekśpierta ŭ vajennaj śfiery Alaksandra Alesina.
«Paviedamleńnie pra sustreču Łukašenki i Hurulova napiaredadni vyletu ŭ Kitaj moža mieć na mecie, z adnaho boku, razdražnić Rasiju. Heta jak by napamin, što voś vy nam nie chacieli dapamahać, a kitajcy dapamahli — i ciapier my majem ułasny rakietny kompleks. Heta dypłamatyčnaja hulnia: my pakazvajem, što majem mahutnaha chaŭruśnika, chaŭruśnika ŭ vajennaj śfiery, jaki taksama, jak i Rasija, źjaŭlajecca siabram Rady Biaśpieki AAN i ŭ vypadku čaho moža svaim pravam «vieta» zabłakavać lubyja antybiełaruskija inicyjatyvy (sankcyi), kali Rasija nie zachoča nas abaraniać», — skazaŭ Alesin.
Taksama jon dumaje, što havorka mahła iści pra pradpryjemstvy VPK, jakija Rasija doŭha i nastojliva choča pryvatyzavać.
«Rasijanie časta robiać niaścipłyja prapanovy ab prodažy našaha «załatoha zapasu», jaki nie maje anałahaŭ u samoj Rasii. Pieradusim heta zavod kołavych ciahačoŭ, «Intehrał», «Pielenh» taksama ich vielmi cikavić, «558 avijaramontny zavod». Mahčyma, jany namiakajuć, što za peŭnyja sastupki ŭ pytańni prodažu mohuć być źmienšanyja hazavyja patrabavańni, śpisanyja daŭhi. Dumaju, Łukašenka vyśviatlaŭ realny stan rečaŭ — što tam rasijanie prapanujuć, na jakich umovach. Ale tut pytańnie, ci pojdzie na heta Łukašenka. Paśla jahonych niadaŭnich krytyčnych zajaŭ heta było b strataj tvaru. Ale na krajni vypadak moža być i taki varyjant, situacyja ŭ našaj ekanomicy dalokaja ad bliskučaj», — dadaŭ Alesin i padkreśliŭ, što ajčynny VPK pracuje vielmi prybytkova i za hod užo naraściŭ ekspart na 20%. Maŭlaŭ, u našaj krainie jašče zaviedziena, što paśpiachovyja haliny «dzielacca» svaimi hrašyma ź mienš udałymi.
Aproč hetaha, na dumku ekśpierta, vidavočna, što havorka viałasia pra pierśpiektyvy biełaruska-kitajskaha supracoŭnictva ŭ vajenna-pramysłovaj śfiery.
«Pytańnie «Pałanezaŭ» — heta toje, što nas vielmi cikavić. Hučali abiacańni, što budzie stvoranaja novaja madyfikacyja, radyusam amal da 300 kiłamietraŭ. Schiema viadomaja — naša elektronnaja načynka i kołavaja baza, i elemienty kitajskaha rakietnaha paliva, jakoha ŭ nas niama. Kaapieracyja pracuje na dva baki — my pradali kitajcam licenziju, i ŭ vyniku jany zrabili ŭłasny rakietny transparcior dla ruchomych hruntovych rakietnych kompleksaŭ siaredniej i stratehičnaj adlehłaści, a my majem «Pałanezy». Taksama Łukašenka dzielicca z kitajcami vajennymi niekali sakretami SSSR», — skončyŭ svaju dumku ekśpiert.
