Na mohiłkach pad Bieraściem 27 vieraśnia adbudziecca adkryćcio pomnika Alesiu Čarkašynu — biełarusu, jaki zahinuŭ letaś u zonie ATA va Ŭkrainie.
Ušanavańnie pamiaci Alesia Čarkašyna (pseŭdanim «Taras») adbudziecca na mohiłkach vioski Kamianica Žyravieckaja a 14-j hadzinie. Tut źbiarucca baćki, rodnyja dy siabry bieraściejca, jaki zahinuŭ va Ŭkrainie.
Jak skazaŭ Svabodzie blizki siabar Alesia Andrej Lubiančuk, čakajucca hości i ź inšych haradoŭ Biełarusi:
«Cikaviacca navat tyja, chto nia viedaŭ Alesia. Źbirajucca ludzi ź inšych haradoŭ Biełarusi, cełaja delehacyja ź Miensku. Pomnik pastavili raniej, ale adkryćcio vyrašyli rabić paźniej, jakraz na dzień narodzinaŭ Alesia. Što tyčycca aŭtarstva pomnika, to pakul aŭtar pažadaŭ zastacca nieviadomym».
Paśla ŭšanavańnia pamiaci Alesia Čarkašyna na mohiłkach u planach arhanizataraŭ paminalnaja sustreča i pakaz dakumentalnaha filmu pra jaho.
«Heta budzie pieradpremjerny pakaz filmu, jaki zrabiŭ režyser Antoś Cialežnikaŭ dla «Biełsatu». Pakul jaho premjery nie było, ale jość zhoda na pakaz u dzień ušanavańnia Alesia Čarkašyna», — kaža Andrej Lubiančuk.
Jak raspavioŭ Andrej Lubiančuk, pakul usioj sumy srodkaŭ na pomnik nie chapaje, ale kolki dakładna, stanie viadoma paźniej, paśla taho, jak pryviazuć achviaravańni ź inšych haradoŭ.
«Na hety momant pryjšło bolš za čatyry tysiačy dalaraŭ achviaravańniaŭ, ale treba amal šeść», — kaža spadar Lubiančuk.
Andrej Lubiančuk padzialiŭsia apisańniem idei ad aŭtara prajektu pomnika Alesiu Čarkašynu:
«Stylistyka pomnika Alesiu Čarkašynu vynikaje z tryjady: Boh, Baćkaŭščyna, Słužeńnie. Heta try najvažniejšyja hrani žyćcia Alesia Čarkašyna, paśmiarotna ŭznaharodžanaha ordenam «Narodny hieroj Ukrainy» i ŭšanavanaha hramadzianskaj supolnaściu na Baćkaŭščynie.
Kampazycyja vyrašana nietradycyjna: u joj krok za krokam apaviadajecca ab pryjarytetach žyćcia, jakoje zaŭčasna abarvałasia, ale nia skončyłasia…