Siońnia pradstaŭniki «Biełpalivahaza» raspaviali pra novy dakumient, jaki abaviaža biełarusaŭ za svoj košt ustaloŭvać u kvaterach apaviaščalniki čadnaha hazu. Ale kuplać novyja pryłady pryjdziecca nie ŭsim, udakładnili ŭ arhanizacyi. Naprykład, tym, u kaho ŭ kvatery z hazavaha abstalavańnia, tolki plita, hetaha rabić nie pryjdziecca.
Kali źmieny prymuć, to ŭstaloŭvać apaviaščalniki čadnaha hazu (CO) treba budzie tolki tym, u kaho doma jość hazavyja katły, kałonki i pratočnyja vodanahravalniki.
— Prybor patrebien tolki tym, u kaho abstalavańnie vyłučaje čadny haz i advod praduktaŭ zharańnia adbyvajecca praz kominy, — rastłumačyŭ hałoŭny inžynier siektara techinśpiekcyi ŭpraŭleńnia sistem hazazabieśpiačeńnia DVA «Biełpalivahaz» Ihar Pietryk. — Heta pytańnie biaśpieki. Tamu što, kali, naprykład, u komin vypadkova patrapić ptuška i ŭsio pierakryje, to niebiaśpiečnyja pradukty zharańnia pojduć u kuchniu.
Apaviaščalniki pryjdziecca kuplać i ŭładalnikam hazavych bojleraŭ z adkrytaj kamieraj zharańnia. Heta tyja, u jakich połymia vidać praz akienca. Uładalnikam pryboraŭ c unutranaj sistemaj zharańnia — pa žadańni.
— Kožny haspadar svajho žyćcia. Kali pryrodny haz, jakim my karystajemsia, maje pach, bo ŭ jaho dadajecca peŭnaje rečyva, to čadny haz pachu i koleru nie maje. I kali ŭsiaho 1% pamiaškańnia napoŭnicca čadnym hazam, to čałaviek hinie na praciahu piaci chvilin, — raspavioŭ Ihar Pietryk.
Płanujecca, što novyja praviły nabuduć moc užo da kanca hoda.
Apaviaščalnik pry fiksacyi SO vydaje hukavy abo śvietłavy sihnał. Akramia hetaha, prybor moža pieradavać sihnał na dyśpietčarski punkt abo na adsiečku dla pierakryćcia hazu ŭ pamiaškańni.
