Pošuki novaj biełaruskaj muzyki dla novaj biełaruskaj kinakamedyi vyrašana praciahnuć da 10 kastryčnika.
Konkurs na saŭndtrek partał Tuzin.fm i tvorčaja supołka Bez Buslou Arts abvieścili pierad samym pačatkam zdymak «Party-Zan filma». Užo pryjšło bolš za 100 trekaŭ, ale stvaralniki filma ŭsio jašče šukajuć tuju samuju melodyju, jakaja stanie lejtmatyvam filma: «My chočam sapraŭdy kruty saŭndtrek, jaki dadaść našamu filmu nastroju i razmaluje jaho! Heta kamedyja pra biełarusaŭ dla biełarusaŭ budzie spaborničać u navahodnim prakacie z zamiežnymi stužkami, i tamu nam patrebna adpaviednaja, novaja, biełaruskaja muzyka», - zajaŭlaje aŭtar scenara, režyser i pradusar stužkiAndrej Kurejčyk.
Dasłanyja na konkurs pieśni pavinny być zapisanyja nie paźniej, čym dva hady tamu, u alternatyŭnych muzyčnych žanrach na biełaruskaj movie (rok, rep, indzi, alternatyva, elektronika). Pieśni ŭ pop-stylistycy nie razhladajucca.
Svaje tvory možna dasyłać u farmacie mr3 (ź bitrejtam 320 kbps) na elektronnuju poštu konkursu [email protected] da 10 kastryčnika ŭklučna. Da lista taksama nieabchodna prykłaści karotkuju infarmacyju pra vykanaŭcu, tekst pieśni z ukazańniem aŭtarstva muzyki i słoŭ. Tyja vykanaŭcy, jakija buduć adabrany redakcyjaj Tuzin.fm i stvaralnikami filmu z tvorčaha abjadnańnia Bez Buslou Arts, zmohuć stać častkaj kamandy, pasupracoŭničać z aŭtarami prajekta i pačuć svaje tvory ŭ samoj stužcy.
Pa siužecie, dva maładziony — niaŭdały biznesoviec i prahramist, jakija zastalisia biaz pracy, biarucca ažyćciavić svaju «biełaruskuju maru» — zarabić šmat hrošaj. Jany pradstaŭlajucca biełaruskimi kinapradusarami i damaŭlajucca na zdymki niekalkich vajennych scenaŭ dla rasiejskaha filmu, ale sutykajucca z šeraham prablemaŭ — im pahražaje sutyknieńnie sa złodziejami i turma za machlarstva
Zdymki filma niadaŭna z pośpiecham byli zavieršany, zastałosia tolki zmantavać i ahučyć, i ŭ chutkim časie budzie hatovypieršy tyzer. Aŭtary stužki źbirajucca zładzić cełuju seryju mierapryjemstvaŭ u padtrymku chulihanskaj biełaruskaj kamedyi. Reliz filma planujecca napiaredadni Novaha hoda ŭ sietcy kinateatraŭ «Silver Screen».
