Kiraŭniki ministerstvaŭ ekałohii krain Jeŭrasajuza ŭ sieradu ŭchvalili pačatak pracedury ratyfikacyi paryžskaha pahadnieńnia pa baraćbie sa źmianieńniem klimatu, pryniataha ŭ śniežni 2015 hoda. Takim čynam, pahadnieńnie ratyfikujuć krainy, adkaznyja za bolš čym pałovu suśvietnych emisij vuhlakisłaha hazu.
«Heta histaryčnaja padzieja», — zajaviła žurnalistam ministr ekałohii Francyi Siehalen Ruajal paśla zakančeńnia pasiadžeńnia kalehii ministraŭ u Brusieli. «Toje, što raniej zdavałasia kamuści niemahčymym, stała realnaściu», — napisaŭ u tvitary staršynia Jeŭrapiejskaj rady Donald Tusk.
Dla ŭstupleńnia pahadnieńnia ŭ siłu nieabchodnaja jaho ratyfikacyja uradami abo parłamientami krain, adkaznych prynamsi za 55% suśvietnych emisij vuhlakisłaha hazu. Raniej jaho ratyfikavała 61 z krain-padpisantaŭ, ale na ich dolu prypadała tolki 48% suśvietnych emisij.
Z zaviaršeńniem ratyfikacyi krainami ES (pracedura pavinna zaniać kala miesiaca) barjer u 55% budzie pieraadoleny.
Pahadnieńnie było padpisanaje na kanfierencyi ŭ Paryžy ŭ 2015 hodzie i stała pieršym u historyi hłabalnym i abaviazkovym da vykanańnia pahadnieńniem pa skaračeńni vykidaŭ parnikovych hazaŭ.
U paryžskaj kanfierencyi ŭdzielničali pradstaŭniki 190 dziaržaŭ. Padpisali dakumient 170 krain, u tym liku Biełaruś, ZŠA, Kitaj i Rasija.
Pavodle pahadnieńnia, usie baki abaviazujucca skaracić vykidy vuhlekisłaty ŭ atmaśfieru, a taksama nie dapuścić hłabalnaha paciapleńnia da 2100 hoda bolš čym na 2 hradusy pa Celsii.
Dakumient praduhledžvaje vyłučeńnie da 2020 hoda krainam, jakija raźvivajucca, 100 młrd dalaraŭ na baraćbu sa škodnymi vykidami.
