Na bałharska-tureckaj miažy pačali svaju dziejnaść novaje Jeŭrapiejskaje pamiežnaje ahienctva i bierahavaja achova. Pra heta paviedamlajecca na sajcie Jeŭrapiejskaj Kamisii.
Pieršy punkt Jeŭrapiejskaha pamiežnaha ahienctva i bierahavoj achovy byŭ adkryty na bałharska-tureckaj miažy pry ŭdziele jeŭrakamisara pa pytańniach mihracyi Dzimitrysa Aŭramopułasa.
«Z hetaha času źniešnija miežy adnoj dziaržavy—siabra ES źjaŭlajucca źniešnimi miežami ŭsich dziaržaŭ-siabroŭ — jak jurydyčna, tak i funkcyjanalna. Mienš čym za hod my stvaryli paŭnavartasnaje Jeŭrapiejskaje pamiežnaje ahienctva i bierahavuju achovu, pieratvarajučy ŭ realnaść pryncypy sumiesnaj adkaznaści i salidarnaści siarod dziaržaŭ—siabroŭ ES. Mienavita heta i źjaŭlajecca adkazam ES, jaki nam nieabchodny dla biaśpieki i mihracyjnych vyklikaŭ 21 stahodździa», — skazaŭ Aŭramopułas.
Paviedamlajecca, što stvareńnie pamiežnaha ahienctva i bierahavoj achovy źjaŭlajecca klučavym mierapryjemstvam u ramkach jeŭrapiejskaha paradku dnia pa mihracyi pa ŭmacavańni kiravańnia i biaśpieki źniešnich miežaŭ ES.
Novaje ahienctva, jakoje budzie mieć u reziervie bolš za 1 500 čałaviek asabovaha składu i nieabchodnaje abstalavańnie, budzie zabiaśpiečvać standarty ES z metaj ažyćciaŭleńnia kantrolu na ŭsich źniešnich miežach i pravodzić pieryjadyčny analiz ryzyk.
Niadaŭna Aŭramopułas zajaŭlaŭ, što pahadnieńnie ES z Turcyjaj, nakiravanaje na strymlivańnie patoku mihrantaŭ u Jeŭropu, užo maje stanoŭčyja vyniki, pakolki napłyŭ mihrantaŭ pamienšyŭsia.
