U zahinułaj u HC «Jeŭropa» 43-hadovaj žančyny zastałasia dačka, paviedamiŭ u sacsietkach lidar RHA «Pierśpiektyva» Anatol Šumčanka. Žančynu zvali Alena.
«Dziaŭčyna, jakuju zabili, vyjšła na zamienu ŭ HC «Jeŭropa» handlavać akularami! Pra jaje viadoma, što jana sirata i ŭ jaje dzicia invalid. HC «Jeŭropa» uziaŭ na siabie ŭsie vydatki pa pachavańni… IP na HC «Jeŭropa» hrošy źbirajuć!» — napisaŭ Šumčanka.
Adna z pradaŭcoŭ raspaviała kp.by, što kali pryjechała chutkaja, akryvaŭlenaja Alena (zahinułaja žančyna) jašče dychała. U jaje jość dačka joj 21 hod, a sama jana sirata. Kali ŭsio zdaryłasia, u jaje razryvaŭsia telefon.
Šumčanka taksama paviedamiŭ, što raźvitańnie z Alenaj adbudziecca ŭ aŭtorak u 12.40 u rytualnaj zale pa adrasie Daŭhinaŭski trakt, 160A.
Nahadajem, što ŭčora, 8 kastryčnika, ŭ handlovym centry «Jeŭropa» ŭ centry Minska chłopiec 1998 hoda naradžeńnia ź bienzapiłoj i siakieraj napaŭ na naviedvalnikaŭ. Adna žančyna była paranienaja, jašče adna zahinuła.
ANT sa spasyłkaj na milicyju ŭ «Navinach» paviedamiŭ, što heta była supracoŭnica kramy. Jana adyšłasia z pracoŭnaha miesca kupić kałhotki. Paźniej SK paviedamiŭ, što jana 1973 h.n.
Pa fakcie napadu raspačata kryminalnaja sprava, paviedamiŭ 9 kastryčnika žurnalistam u Minsku pieršy namieśnik staršyni Śledčaha kamiteta Alaksiej Vołkaŭ.
«Pa hetym fakcie zaviedziena kryminalnaja sprava. Jana pryniata da vytvorčaści śledčymi centralnaha aparata Śledčaha kamiteta. Pravodziacca śledčyja dziejańni», — painfarmavaŭ BiełTA Vołkaŭ.
Napadnik byŭ adzin. A čutki pra toje, što napadnikaŭ było niekalki, źviazanyja z tym, što čałavieka bačyli spačatku ź bienzapiłoj, potym ź siakieraj, rastłumačyli ŭ Śledčym kamitecie.
Milicyja ź miesca zdareńnia paviedamiła padrabiaznaści trahiedyi.
«Małady čałaviek 1998 hoda naradžeńnia ŭ 17:28 pryjšoŭ u HC «Jeŭropa». Jon byŭ dobra apranuty, u jaho byŭ čachoł dla hitary, u jakoj była siakiera, a pry sabie bienzapiła. Jon zaviedzienaj bienzapiłoj pryčyniŭ cialesnyja paškodžańni žančynie, jana pamierła. Potym rasšpiliŭ čachoł, dastaŭ siakieru i pačaŭ pahražać pakupnikam. Hramadzian było niašmat, try-čatyry čałavieki.
U 17:34 pastupiŭ pieršy zvanok u dziažurnuju častku HUUS,
u 17:35 prybyŭ pieršy narad…
U 17:38 napadnik byŭ zatrymany. Jon znachodzicca ŭ dziažurnaj častcy RUUS».
Zajava milicyi (videa)
Cieła zahinułaj lažała na pieršym paviersie HC «Jeŭropa», kala ŭvachodu ŭ kaviarniu. Jano było bačnaje z vulicy tolki z adnaho rakursu — na aśvietlenym łapiku padłohi miž stałami.
Nasupierak čutkam pieršych chvilin, paviedamlaŭ karespandent NN, hałava achviary nie adrezanaja. Na padłozie była vidać kroŭ. Terytoryju vakoł cieła vyvučali śledčyja — niekalki čałaviek u cyvilnym.
