Aleś Tałstyka i Uładzimir Padhoł, fota Siarhieja Saciuka, BiełaPAN
Fiłosaf Uładzimir Padhoł vyrašyŭ vyjści z Partyi BNF u suviazi z asudžeńniem kiraŭnictvam i aktyvam partyi mietadaŭ, jakija jon vykarystaŭ padčas minułaj parłamienckaj kampanii. Takoje rašeńnie Padhoł pryniaŭ na pasiadžeńni sojma partyi 8 kastryčnika ŭ Minsku, paćvierdziŭšy jaho ŭ adkrytym liście da vybarščykaŭ, členaŭ i kiraŭnictva partyi, tekst jakoha 10 kastryčnika razasłaŭ u ŚMI.
Padčas parłamienckich vybaraŭ Padhoł pryciahnuŭ da siabie ŭvahu dziakujučy šmatlikim akcyjam u miežach ahitacyjnaj kampanii. Jon vystupaŭ na telebačańni i sustrakaŭsia z vybarščykami ŭ broniekamizelcy i tankavym šlemie, źbiraŭ podpisy jak pad nacyjanalnym ściaham Biełarusi, tak i pad ściahami Jeŭrasajuza i ZŠA, razam ź jašče adnym kandydatam u deputaty pravodziŭ jarkija palityčnyja pierformansy pa pieradačy zvarotaŭ da Alaksandra Łukašenki i inšych słužbovych asob z patrabavańniami z prahramy Partyi BNF.
Na pasiadžeńni sojma vyśvietliłasia, što hetyja mietady nie znajšli padtrymki ŭ kiraŭnictva i radavych členaŭ partyi. U pryvatnaści staršynia Partyi BNF Alaksiej Janukievič papraknuŭ Padhoła ŭ tym, što jaho ekscentryčny vobraz na hetych vybarach i vystupleńni pad ściahami zamiežnych krain, mahčyma, adstrašyli biełaruski biźnies, na padtrymku jakoha spadziajecca partyja. Niekalki členaŭ partyi na sojmie taksama niehatyŭna acanili dziejańni Padhoła padčas vybarčaj kampanii. Adrazu paśla hetaha fiłosaf napisaŭ zajavu ab vychadzie, padaŭ jaje Janukieviču i pakinuŭ pasiadžeńnie sojma.
U adkrytym liście fiłosaf adznačyŭ, što «hłybinnaj pryčynaj vychadu źjaviłasia pazicyja kiraŭnictva BNF u dačynieńni da adstojvańnia partyjnaj prahramy i, adpaviedna, usich kandydataŭ u deputaty ad partyi padčas vybaraŭ». «Kali Lidzija Jarmošyna pryhraziła represijami tym kandydatam, jakija buduć prapahandavać partyjnyja kaštoŭnaści ŭ ŚMI, kiraŭniki BNF tak i nie zdoleli publična zajavić pra salidarnaść z kaštoŭnaściami partyi», — padkreśliŭ Padhoł.
Pavodle statuta Partyi BNF rašeńnie ab vyklučeńni kankretnaha člena vynosić terytaryjalny orhan, jaki prymaŭ jaho ŭ skład partyi, albo sojm Partyi BNF. Na pasiadžeńni sojma Janukievič zajaviŭ, što rašeńnie adnosna Padhoła prymie miascovaja arhanizacyja i tolki paśla asabistaj hruntoŭnaj hutarki ź fiłosafam, jaki žadaje pakinuć šerahi partyi.
