Premjer-ministry Biełarusi i Rasii ŭ telefonnaj razmovie 10 kastryčnika abmierkavali pytańni ŭzajemadziejańnia ŭ naftahazavaj śfiery.
Jak paviedamlaje pres-słužba biełaruskaha ŭrada, u pryvatnaści, Andrej Kabiakoŭ i Dźmitryj Miadźviedzieŭ abmierkavali vyniki praviedzienych 7 kastryčnika ŭ Maskvie pieramoŭ vice-premjeraŭ pa hetaj tematycy, u chodzie jakich byŭ uzhodnieny adpaviedny prajekt pratakoła.
Padčas razmovy kiraŭniki ŭradaŭ paćvierdzili dasiahnutyja damoŭlenaści ab tym, što na ŭzroŭni kamiercyjnych arhanizacyj na 2016 hod zachoŭvajecca taki ž miechanizm farmiravańnia cany na pryrodny haz dla Biełarusi, jak i ŭ minułym hodzie. U suviazi z hetym biełaruski bok paćvierdziŭ hatoŭnaść pieraličyć zareziervavanyja z pačatku hoda srodki na rachunki pastaŭščykoŭ hazu.
Adnačasova rasijskim bokam paćvierdžanaja hatoŭnaść prymianieńnia miechanizmu mižbiudžetnaj kampiensacyi, srodki ad jakoj buduć vykarystanyja biełaruskim bokam pierš za ŭsio dla źnižeńnia cany na haz dla nacyjanalnych spažyŭcoŭ.
«Abjom srodkaŭ, jakija pieraličvajucca ŭ ramkach mižbiudžetnaj kampiensacyi, daść mahčymaść zabiaśpiečyć vychad na trajektoryju paśladoŭnaha zbližeńnia cany na pryrodny haz dla biełaruskich i rasijskich spažyŭcoŭ, z tym kab da 1 lipienia 2019 hoda zabiaśpiečyć roŭnyja ŭmovy pa canie na haz dla vytvorcaŭ enierhii, a da 1 studzienia 2025 hoda — dla ŭsich astatnich spažyŭcoŭ hazu», — havorycca ŭ paviedamleńni pres-słužby ŭrada Biełarusi.
«Heta rašeńnie biełaruski bok razhladaje jak kampramisnaje, jano adpaviadaje intaresam abodvuch bakoŭ», — padkreślivajecca ŭ paviedamleńni.
Nahadajem, siońnia ŭ Minsku paśla dakłada ŭ Alaksandra Łukašenki vice-premjer biełaruskaha ŭrada Uładzimir Siamaška zrabiŭ šerah zajaŭ ab vyrašeńni hazavaj i naftavaj sprečki pamiž Rasijaj i Biełaruśsiu. Tak, jon zajaviŭ, što Biełaruś da 25 kastryčnika pahasić zapazyčanaść za pastaŭleny pryrodny haz u abmien na źnižeńnie cany z 1 lipienia. Taksama ŭ poŭnym abjomie buduć adnoŭleny pastaŭki nafty na biełaruskija NPZ, u toj čas jak Biełaruś admienić raniej pryniataje rašeńnie ab pavyšeńni taryfaŭ na transparciroŭku nafty pa svajoj terytoryi.
Razam z tym Dźmitryj Miadźviedzieŭ na naradzie ź vice-premjerami zajaviŭ, što skidki pa cenach na haz dla Biełarusi nie praduhledžany, jany zastajucca raniejšymi. Vice-premjer RF Arkadź Dvarkovič zajaviŭ, što Biełaruś pahasić doŭh za haz da 20 kastryčnika.
