Uładzimir Andrejčanka abrany staršynioj Pałaty pradstaŭnikoŭ Nacyjanalnaha schodu šostaha sklikańnia. Vybary kiraŭnika novaha parłamienta adbylisia 11 kastryčnika.
Andrejčanka vyłučaŭsia na pasadu staršyni na biezalternatyŭnaj asnovie. Za jaho pa vynikach tajnaha hałasavańnia svaje hałasy addali 109 deputataŭ, suprać — adzin. Andrejčanka ź`iaŭlaŭsia staršynioj Pałaty pradstaŭnikoŭ čaćviortaha i piataha sklikańniaŭ.
«Dla mianie heta vialiki honar, — prakamientavaŭ Andrejčanka vyniki hałasavańnia. — Heta acenka nie tolki majoj dziejnaści, ale i deputataŭ Pałaty pradstaŭnikoŭ piataha sklikańnia». «U Pałatu pradstaŭnikoŭ šostaha sklikańnia pryjšli hodnyja, nieabyjakavyja, vielmi padrychtavanyja ludzi. Dumaju, u nas budzie kanstruktyŭnaja zładžanaja praca pa realizacyi palityčnaha kursu, vypracavanaha narodam i prezidentam», — dadaŭ jon.
Abrać Andrejčanku na pasadu staršyni Pałaty pradstaŭnikoŭ prapanavała deputat Natalla Hujvik. Jaje ŭ svaich vystupleńniach padtrymali jašče niekalki parłamientaryjaŭ. Na dumku Hujvik, Andrejčanka ź`iaŭlajecca «lidaram, jakoha pavažajuć, da dumki jakoha prysłuchoŭvajucca nie tolki deputaty, ale i pradstaŭniki inšych halin ułady».
Sam Andrejčanka padčas svajho vystupleńnia zajaviŭ, što pasprabuje «apraŭdać davier, zrabić usio, kab pavysić aŭtarytet parłamienta». Jon taksama adznačyŭ, što nieabchodna pavysić «adkrytaść vybarčaha pracesu», «nie bajacca čužoha punkta hledžańnia». Adnak, dadaŭ Andrejčanka, «sprečki i dyskusii nie pavinny pieraškadžać kanstruktyŭnaj parłamienckaj pracy».
