Namieśnik hienieralnaha dyrektara pa markietynhu i zamiežnaekanamičnaj dziejnaści avijakampanii «Biełavia» Ihar Čarhiniec u svaim fejsbuku prakamientavaŭ inicyjatyvu ministra infrastruktury Ukrainy Uładzimira Amialjana, kab z ukrainskich aeraportaŭ źnikła rasiejskaja mova.
Ihar Čarhiniec. Fota tut.by.
Amialjan ličyć, što ŭsia infarmacyja, jakaja raźmiaščajecca na tabło, šyldach, ukazalnikach i taja, što ahučvajecca, pavinna być na ŭkrainskaj i anhlijskaj movach. Na siońniašni momant u aeraportach Ukrainy infarmacyja ahučvajecca na ŭkrainskaj, rasiejskaj, anhlijskaj, a taksama na movie, kudy adbyvajecca rejs.
«Nu, a zaraz ujavim dapuścim pažyłoha tadžyka, jaki vandruje praz adzin z aeraportaŭ Kijeva. Anhlijskaj i ŭkrainskaj jon nie razumieje. Zvyčajna ŭ avijacyjnym biznesie avijapradpryjemstvy naadvarot pavinny iści nasustrač pasažyram. Ukrainskija aeraporty stanuć «niepryjaznymi» da ludziej, jakija havorać pa-rusku ci razumiejuć ruskuju, ale nie razumiejuć ŭkrainskuju abo anhlijskuju. Praściej kažučy, absłuhoŭvańnie pasažyraŭ pahoršaje ŭ paraŭnańni ź siońniašnim stanam. Palityku znoŭ sprabujuć zasunuć u biznes», — napisaŭ u sacsietcy Ihar Čarhiniec.
Abmierkavańnie hetaha tezisa namieśnika hienieralnaha dyrektara «Biełavija» atrymałasia dastatkova burnym.
«Davajcie ujavim stałaha francuza. Anhielskaj jon nie razumieje, a ruskaja z ukrainskaj jamu naohuł na adzin tvar. Jak strašna žyć», — iranizuje Andrej Razanaŭ.
Na zaŭvahu, što ŭ hałoŭnym aeraporcie Kijeva Baryspali i tak usia infarmacyjnaja padtrymka była tolki na ŭkrainskaj i anhlijskaj, Ihar Čarhiniec adznačaje: «Kamiercyjnyja pradpryjemstvy (aeraport i avijakampanija) zaŭsiody znojduć svajo rašeńnie. Nie treba čynoŭnikam u heta ŭmiešvacca, i ŭsio budzie dobra. Zrazumiejuć, što treba adnu movu abjaŭ — budzie adna, treba čatyry (jak u aeraporcie Praha) — budzie čatyry».
«Asabista ŭ mianie prablem nie budzie, a voś hruzin/tadžyk/azierbajdžaniec, jaki lacić tranzitam praz Baryspal u Minsk, moža i nie vielmi zrazumieje, što takoje Minśk. U lubym vypadku, kali heta rašeńnie kamiercyjnaje i ad jaho lepš stanie pasažyram, to niama nijakich prablem», — praciahvaje spadar Čarhiniec.
«Navošta vynachodzić rovar? Jość zvyčajnaja suśvietnaja praktyka: abjavy robiacca na movie krainy vyletu, movie krainy prybyćcia i na anhlijskaj movie dla astatnich. Usio», — ličyć Juryj Zalaźniak.
«Ja tak razumieju, što Minsk-2 — apošni rubiež dla stałych tadžykaŭ u zachodnim kirunku. Im hałoŭnaje ŭ minskaje mietro nie spuskacca, a to kapcy — zhubiacca», — iranizuje błohier Sieviaryn Kviatkoŭski.
«Ujaviła takoha zahublenaha Chatabyča ŭ chałacie z dyniami pad pachaju. Kidajecca, biedny, tudy-siudy», — napisała piśmieńnica Śviatłana Kurs.
