U pakistanskim Piešavary aryštavanaja afhanskaja žančyna, čyj zdymak trapiŭ na vokładku National Geographic ŭ 1985 hodzie i staŭ samaj znakamitaj fatahrafijaj za ŭvieś čas isnavańnia časopisa, paviedamlaje VVS.
Getty
Šarbat Huła, jakoj ciapier kala 40 hadoŭ, była aryštavanaja pakistanskimi śpiecsłužbami, jakija vyśvietlili, što jana pražyvaje ŭ krainie z padroblenymi dakumientami.
Pakistanskija ŭłady zapadozryli žančynu ŭ niezakonnym pražyvańni ŭ krainie jašče ŭ pačatku minułaha hoda, kali ŭ presie była apublikavanaja jaje fatahrafija z pakistanskaha pašparta.
Taksama paviedamlałasia, što pakistanskija pašparty byli vyjaŭlenyja ŭ dvuch mužčyn, jakija nazyvali siabie synami Šarbat Huły.
Kali vina žančyny paćvierdzicca, joj moža pahražać da 14 hadoŭ turmy i bujny štraf.
Fotazdymak Šarbat Huły źjaviŭsia na vokładcy National Geographic u červieni 1985 hoda, kali joj było kala 12 hadoŭ. Zdymak byŭ zrobleny amierykanskim fotareparcioram Styvam Makary ŭ łahiery afhanskich biežancaŭ na miažy z Pakistanam.
Praca Makary chutka atrymała niejmavierny pośpiech va ŭsim śviecie i stała samaj znakamitaj fatahrafijaj za ŭvieś čas isnavańnia časopisa. Niekatoryja krytyki paraŭnoŭvali jaje z Monaj Lizaj Leanarda da Vinčy pa ŭzroŭni ŭździejańnia na hledača.
Asobu dziaŭčynki z vokładki udałosia vyjavić tolki ŭ 2002 hodzie, kali kamanda National Geographic śpiecyjalna pryjechała ŭ Afhanistan na jaje pošuki. Tady ž Makary źniaŭ jašče adzin jaje fotapartret.
