Nieŭzabavie fłeški, dyski i inšyja padobnyja nośbity infarmacyi dla biełaruskich pakupnikoŭ padaražejuć. Atrymanyja hrošy, jak miarkujecca, pojduć na ŭznaharodžańnie biełaruskich tvorcaŭ za vykarystańnie ich tvoraŭ praź internet pryvatnymi asobami.
Pra heta raspavioŭ staršynia praŭleńnia niadaŭna stvoranaha Biełaruskaha tavarystva aŭtaraŭ, vykanaŭcaŭ i inšych pravaŭładalnikaŭ Siarhiej Kuchto, piša Jeŭraradyjo sa spasyłkaj na «Savieckuju Biełarusiju».
Pa jaho słovach, novaje tavarystva nie kankuruje z Nacyjanalnym Centram intelektualnaj ułasnaści (NCIU), dzie jość padraździaleńnie pa abaronie aŭtarskaha i sumiežnych pravoŭ. Naadvarot, jany płanujuć dziejničać sumiesna. NCIU abaraniaje pravy pry publičnym vykarystańni tvoraŭ. A novaje hramadskaje abjadnańnie stanie sačyć za zachavańniem aŭtarskich pravoŭ pry kapijavańni aŭdyja- i aŭdyjovizualnych tvoraŭ šarahovymi karystalnikami.
Takim čynam, kožny, chto spampoŭvaje muzyku abo kino ź internetu, budzie pieraličvać hrošy tvorcam. Novaje tavarystva płanuje zaklučyć damovy na adličeńni z tymi, chto vyrablaje albo ŭvozić u Biełaruś tavary dla zachoŭvańnia i kapijavańnia infarmacyi. «Šarahovy spažyviec, nabyŭšy ŭ kramie, naprykład, fłešku ci dysk, zapłacić za ich, umoŭna kažučy, nie 10 rubloŭ, a 10 rubloŭ i 0,001 kapiejki. Hetyja 0,001 kapiejki i adpraviacca ŭ aŭtarskaje tavarystva, dzie adsočać i vyznačać rejtynhi zapampovak, i ŭ zaležnaści ad ich zrobiać adpaviednyja adličeńni tamu ci inšamu aŭtaru», — tłumačyć Kuchto.
Novaje tavarystva było zarehistravanaje ŭ červieni ŭ Ministerstvie justycyi i ciapier čakaje dziaržaŭnaj akredytacyi. U jaho ŭvajšli kala 60 pradstaŭnikoŭ muzyki, teatra, kino. Siarod ich — dramaturh Alaksiej Dudaraŭ, śpievaki Alaksandr Cichanovič i Jadviha Papłaŭskaja, Anatol Jarmolenka, režysior Alaksandr Jafremaŭ, aktrysy Śviatłana Suchaviej i Valeryja Arłanava.
