U piatnicu Vilenski akruhovy sud pryznaŭ troch byłych savieckich amapaŭcaŭ vinavatymi ŭ zabojstvie litoŭskich słužbovych asobaŭ na KPP Miadzininkaj ŭ 1991 hodzie. Jany asudžanyja na pažyćciovaje źniavoleńnie, paviedamlaje LETA.
Delfi
«Abvinavačvańni całkam paćvierdzilisia», — zajaviła sudździa Jałanta Čapukienie.
Hramadzianie Rasii Andrej Łakcijonaŭ, Česłaŭ Młyńnik i Alaksandr Ryžoŭ pryznanyja vinavatymi ŭ zabojstvie hramadzianskich asob — supracoŭnikaŭ palicyi i mytni, hetaje złačynstva było kvalifikavanaje jak złačynstva suprać čałaviečnaści. Sud zadavoliŭ pazoŭ Hienprakuratury i pastanaviŭ padsudnym vypłacić dziaržavie 653 850 jeŭra škody. Taksama prysudžanyja statysiačnyja pazovy na karyść blizkich zabitych.
Abvinavaŭčy prysud byŭ začytany biez prysutnaści abvinavačanych, bo jany nie ŭdzielničajuć u pasiadžeńniach u Litvie.
Rasija ŭ hetym pytańni nie supracoŭničaje ź Litvoj i nie zhadžajecca vydavać svaich hramadzian. Litoŭskija zakony ŭ peŭnych vypadkach dazvalajuć razhladać spravy biez prysutnaści abvinavačanych.
Prysud nie źjaŭlajecca kančatkovym — jon moža być abskardžany na praciahu 20 dzion u Apielacyjnym sudzie Litvy.
Abaroncy prasili apraŭdać abvinavačanych, kali ich vina nie budzie dakazanaja, a kali i budzie, to pry pryznańni vinavataści abrać bolš miakkaje pakarańnie, čym prapanujuć prakurory. Hienprakuratura prosić pryznać usich abvinavačanych vinavatymi i pakarać ich pažyćciovym pazbaŭleńniem svabody.
Prapanoŭvajučy pakarańnie dziaržabvinavaŭca, prakuror Saŭlus Viarsiackas zajaŭlaŭ, što słužbovyja asoby na KPP u Miadzininkaj byli zabityja padčas vajennaj ahresii, jakaja doŭžyłasia ŭ toj čas, amapaŭcy parušyli zakony i zvyčai vajny, ažyćciavili złačynstvy suprać miru i čałaviečnaści, jakija ŭvachodziać u jurysdykcyju Niurnbierhskaha trybunała.
Pa słovach Viarsiackasa, choć u toj čas u Litvie nie była praduhledžanaja adkaznaść za złačynstvy suprać čałaviečnaści, užo dziejničali normy mižnarodnaha prava, jakija praduhledžvajuć adkaznaść za padobnyja złačynstvy. Abvinavačanyja sapraŭdy viedali i ŭśviedamlali palityku, jakaja ažyćciaŭlajecca Savieckim Sajuzam.
Zhodna z materyjałami spravy, kiraŭnik Ryžskaha AMAPa Młyńnik daŭ zahad napaści na KPP u Miadzininkaj, a Łakcijonaŭ i Ryžoŭ hety zahad vykanali ŭ adpaviednaści z savieckaj palitykaj.
Sprava była pieradadzienaja ŭ sud u śniežni 2013 hoda.
Heta druhaja sprava, jakaja źviazanaja z hetym złačynstvam i patrapiła ŭ sud. Pakul u suviazi z zabojstvami ŭ Miadzininkaj asudžany adzin čałaviek — viasnoj 2011 hoda Vilenski akruhovy sud asudziŭ hramadzianina Łatvii, byłoha amapaŭca Kanstancina Michajłava (Nikulina) na pažyćciovaje źniavoleńnie.
Michajłaŭ padaŭ skarhu ŭ Apielacyjny sud, sud u lutym jaje adchiliŭ i prysud ustupiŭ u siłu.
Pryznać troch amapaŭcaŭ padazravanymi i pieradać spravu ŭ sud stała mahčymym, kali ŭ śniežni 2010 hoda byli pryniatyja papraŭki da Kryminalna-pracesualnaha i Kryminalnaha kodeksa ab prymianieńni kryminalnaj adkaznaści za złačynstvy suprać čałaviečnaści i vajennyja złačynstvy. Hetyja papraŭki praduhledžvali mahčymaść zaviaršeńnia dasudovaha rasśledavańnia biez udziełu padazravanych u pracesie.
U noč 31 sakavika 1991 h. pry napadzie amapaŭcaŭ na KPP Miadzininkaj na miažy pamiž Litvoj i Biełaruśsiu byli zabityja supracoŭniki Litoŭskaj palicyi Mindaŭhas Bałavakas, Alhimantas Juazakas, Juozas Janonis, Alhirdas Kazłaŭskas, i mytniki Stanisłavasam Arłavičus, Antanas Mustejkis i Ryčardas Rabavičus (apošni 2 žniŭnia pamior u špitali).
