Mižnarodnaja hrupa kampanijaŭ «Itera» zabuduje centar biełaruskaj stalicy razam z maskoŭskimi kalehami HK SU‑155 (dola ŭ prajekcie —15%) i «Vnukovo‑Inviest» (5%).
Na miescy aeraportu «Miensk‑1» paŭstanie dziełavy centar «Miensk‑Sici», jaki abydziecca investaru ŭ $4,8 młrd. Pavodle planaŭ da 2020 h. na płoščy 318 ha majuć pabudavać mini‑horad z nasielnictvam 55‑‑60 tys. čałaviek, paviedamiŭ u interviju hazecie «Biełorusy i rynok» hiendyrektar STAA «Miensk‑Sici» Siarhiej Kisialoŭ. Źjaviacca kala 1,5 młn kv. m žylla, pad ofisy i hateli budzie adviedziena 550 tys. kv. m, na handlovyja mety — 200 tys. kv. m.
Siarod investaraŭ, zaprošanych MHK «Itera» — maskoŭskaja budaŭničaja kampanija HK SU‑155, jakaja specyjalizujecca na panelnaj zabudovie (dola ŭ prajekcie —15%), «Vnukovo‑Inviest» (5%), jakoje źjaŭlajecca stratehičnym partneram «Itery» ŭ spravie vynasu z terytoryi zabudovy Mienskaha avijaramontnaha zavodu, a taksama šerah rasiejskich bankaŭ.
Biełaruskija prajektnyja i budaŭničyja arhanizacyi ŭ prajekcie nie zadziejničanyja, «praz adsutnaść adpaviednaha vopytu ŭ sfery vysotnaj pabudovy».
Biznes‑centar pamiž vulicami M.Tanka i Kalvaryjskaj budzie składacca z kompleksu budynkaŭ: 30‑paviarchovaha žyłoha domu i dvuch budynkaŭ vyšynioj 43 i 54 pavierchi. Žyły dom pabuduje ŭsio taja ž taja HK SU‑155.
Kiraŭnictva prajektu pabudovy biznes‑centru na Tanka zapeŭnivajuć, što jon uličvaje intaresy miascovych žycharoŭ, nie sapsuje vyhlad hetaha rajonu horadu i ekalahičnaje stanovišča. Adnak žychary rajonu nia zhodnyja z hetym mierkavańniem. Pra toje ŭ traŭni napisała hazeta «Źviazda». Ludziej aburyła toje, što prajekt raspracavali i pačali ažyćciaŭlać biez uliku ich mierkavańnia. Schod žycharoŭ bližejšych vulicaŭ arhanizavali tolki paśla źjaŭleńnia na budučych budaŭničych placoŭkach buldozeraŭ.
