Aleś Paškievič (sprava) supravadžaje Alaksandra Kazulina na rehistracyju kandydatam u prezydenty.
Fota Julii Daraškievič
Kiraŭnika Sajuzu biełaruskich piśmieńnikaŭ Alesia Paškieviča zvolnili z pasady dacenta na filalahičnym fakultecie Biełdziaržuniversytetu.
Pahroza zvalnieńnia nad Paškievičam visieła daŭno, jašče z taho času, jak jon aktyŭna zaanhažavaŭsia ŭ palityčnuju kampaniju A.Kazulina. Na fakultecie, jak kaža Paškievič, vakoł jaho pačała štučna stvaracca nehatyŭnaja atmasfera. Kab nie praciahvać histeryi, kiraŭnik SBP prapanavaŭ «mirnaje pahadnieńnie»: jon napisaŭ zajavu na zvalnieńnie «pa ŭzhadnieńni bakoŭ» (bo pracuje na kantrakcie), ale nie prastaviŭ daty. U kiraŭnictva fiłfaku jon paprasiŭ mahčymaści dačytać da kanca navučalnaha hodu kursy, jakija viadzie ŭ studentaŭ, a ź vieraśnia 2006 h. mieŭsia syści.
Adnak 17 krasavika Paškieviča vyklikali ŭ adździeł kadraŭ BDU i prapanavali prykłaści podpis pad zahadam pra zvalnieńnie i zabrać pracoŭnuju knižku. Na zaŭvahu Paškieviča, što zajava nie aformlenaja naležnym čynam i nijakaha «ŭzhadnieńnia bakoŭ» nie było, kadravička tolki ściepanuła plačyma.
Kudy ciapier padavacca na pracu, Aleś jašče nia viedaje. Kaža, što padumać pra heta nie paśpieŭ, bo ŭvieś čas zabiraje padrychtoŭka da sudovaha pracesu: Minjust źbirajecca likvidavać najstarejšy tvorčy sajuz Biełarusi. Adnak zdavacca Paškievič nie źbirajecca i razhladaje mahčymaść sudu suprać BDU za niezakonnaje zvalnieńnie.
AŠ
