Sajt kyky.org znajšoŭ hierainiu, jakaja ŭładkavałasia kiroŭcam da dački čynoŭnicy, i apublikavaŭ jaje manałoh-spoviedź.
Koratka pierakažam historyju. Šmatdzietnaja maci šukała praź internet pracu kiroŭcam. Joj pazvaniła čynoŭnica i naniała vazić svaju dačku Kaciarynu va ŭniviersitet. Spačatku hierainia artykuła pracavała kamfortna, ale ź ciaham času Kaciaryna stała ŭsio bolš nachabničać. Urešcie kiroŭca zvolniłasia, i ciapier šukaje zvyčajnuju pracu.
Ilustratyŭnaje fota z Kuku.org.
Historyja vyhladaje prydumanaj, i heta prajaŭlajecca jak u drobnych faktach, tak i ahulnym pasyle.
Pavodle artykuła-spoviedzi, dačka čynoŭnicy ŭ studzieni latała ŭ Kuršaviel, u mai — na (mienavita «na», a nie «ŭ» — «NN») San-Siebaśćian, a ŭ vieraśni — u Dubaj. Adkiniem toj fakt, što San-Siebaśćianski fiestyval pravodzicca ŭ vieraśni, a nie mai.
Hałoŭnaje inšaje — biełaruskija čynoŭniki, pry ŭsich svaich plusach i minusach, nikoli nie byli zaŭvažanyja ŭ pakaznoj raskošy. Dzieci premjer-ministra Andreja Kabiakova latajuć na adpačynak u Barsiełonu łaŭkostami!
Začepka ŭ artykule — žančyna-čynoŭnica, jakaja žyvie ŭ domie ŭ prestyžnym pasiołku. Elitnaje žyllo u Minsku i vakoł jaho byvaje dvuch vidaŭ. Albo heta niešta nakštałt Drazdoŭ, dzie darahaja ziamla vydzialajecca pad katedžy biaspłatna. Ale śpis žycharoŭ tut abmiežavany, žančyn-čynoŭnic možna pierabrać pa palcach.
Inšy varyjant — pasiołki biznesoŭcaŭ nakštałt Marjaliva, Raŭbičaŭ i hetak dalej. Tam ludzi budujucca za ŭłasnyja hrošy, vykuplajučy ziamlu i katedžy pa rynkavaj canie. Ciapier heta minimum $500—800 tysiač, raniej było tańniej, ale ŭ lubym razie nieparaŭnalna ź ministerskimi zarobkami.
Nivodnaja biełaruskaja top-čynoŭnica nie pryjšła va ŭładu z ułasnaha biznesu. Usie jany nie majuć takoha startavaha kapitału, kab nabyć dom i nie bajacca padatkovaj ź dziaržkantrolem.
Davajcie piarojdziem da piersanalij, razhladajem tolki top-čynoŭnic, bo ŭ načalnic upraŭleńniaŭ ministerstvaŭ nie chopić zarobku ŭtrymlivać absłuhu.
Vice-premjerka Natalla Kačanava maje dźviuch dačok, ale jany zamužam i da apošniaha času žyli ŭ Połacku ci Navapołacku. Čynoŭnica tolki pačynaje budaŭnictva svajho doma. Da taho ž padziei artykuła nibyta adbyvalisia niekalki hadoŭ tamu, a Kačanava pierajechała ŭ Minsk tolki ŭ samym kancy 2014 hoda.
U namieśnicy staršyni Savieta Respubliki, kolišniaha ministra pracy Maryjany Ščotkinaj jość tolki syn, dyj dabudavanaha doma jašče niama.
Staršynia Centrvybarkama Lidzija Jarmošyna taksama haduje syna. Taki ž skład siamji i ŭ byłoj pamočnicy prezidenta Natalli Piatkievič. A voś u namieśnicy kiraŭnictva spravami prezidenta Nadziei Katkaviec — zhadajem i jaje! — čaćviora synoŭ.
Chto jašče z žančyn pry ŭładzie? Ministr infarmacyi Lilija Ananič maje, aproč syna, jašče i dačku, ale taja žyvie z mužam i dziećmi ŭ Maskvie.
Abiedźvie dački byłoj staršyni Nacbanka Nadziei Jermakovaj užo daŭno nie studentki.
Admiatajem i kandydaturu kiraŭnicy Biełaruskaj kalijnaj kampanii Aleny Kudraviec, jakaja jašče tolki dabudoŭvajecca ŭ Minsku.
Asabistyja doktarki Alaksandra Łukašenki taksama nie padychodziać pad apisańnie, choć jany ŭ lubym razie nie čynoŭnicy. U Iryny Abielskaj syny, a Śviatłana Kanašenka zanadta maładaja, kab niekalki hadoŭ tamu mieć dačku-studentku.
U čym sutnaść łukašenkaŭskaj sistemy matyvacyi čynoŭnikaŭ, jakuju nie zrazumieła aŭtarka Kuku.orh? U adroźnieńnie ad Rasii, dabroty vydajucca nie hrašyma, a pasłuhami i nieruchomaściu. Luby top-čynoŭnik maje elitny katedž, vydatnaje miedycynskaje absłuhoŭvańnie, harantyi na biaźbiednaje žyćcio, kali zastajecca ŭ sistemie. Ale jon nie maje na leciščy składa z hrašyma! I navat kali ŭmoŭnamu ministru ŭdałosia stvaryć taki skład dalaraŭ patajemna, jon ni ŭ jakim razie nie budzie demanstravać raskošu, kab nie pryciahnuć uvahu.
